माछा मार्दा एकको मृत्यू भएपछि ८ पक्राउ

पाल्पा १ माघ। अनधिकृत रूपमा विद्युत चोरी गरी माछा मार्ने क्रममा साथीको ज्यान गएपछि पाल्पा प्रहरीले ८ जनालाई पक्राउ गरेको छ । जिल्लाको माथागढी–१, अघाहाखोलामा माछा मार्ने क्रममा शनिबार बेलुकी करेन्ट लागेर रम्भा गाउँपालिका–४, का ३० वर्षीय विष्णुबहादुर थापाको ज्यान गएको थियो ।थापाको तानसेनस्थित पाल्पा अस्पतालमा उपचारको क्रममा मृत्यु भएको थियो । विद्युतको मेन लाइनमा बगेको विद्युत हुक गरी माछा मार्ने क्रममा थापालाई करेन्ट लागेको थियो ।घटनामा परी थापाको मृत्यु भएपछि प्रहरीले माछा मार्न सँगै गएका ८ जनालाई पक्राउ गरी अनुसन्धान अगाडि बढाएको हो ।
पक्राउ पर्नेमा रम्भा–४, का २५ वर्षीय यमप्रसाद दर्लामी, सोही स्थानका २१ वर्षीय विष्णुबहादुर दर्लामी, १८ वर्षीय सुजन रेश्मी, २४ वर्षीय सोमबहादुर सिंजाली, २९ वर्षीय सोमबहादुर गाहा रहेका छन् । यस्तै रम्भा ४ हुमिनकै ३० वर्षका रिकमान दर्लामी, १६ वर्षका निसान दर्लामी र २३ वर्षका मदनबहादुर थापा रहेका छन् ।