आँखा शिविरमा ५ सय भन्दा बढि लाभान्वीत, ५६ जनालाई मोतिया विन्दु

हरि घिमिरे
कपिलवस्तु, १८ चैत्र ।
कपिलवस्तुको बाणगंगामा संचालन भएको आँखा शिविर बाट पाँच सय भन्दा बढि लाभान्वीत भएका छन् । बाणगंगा वडा नम्बर ९ स्थित कपिल आरोग्य मन्दिर कपिलधाममा शनिबार आयोजना गरिएको निःशुल्क आँखा चेकजाँच शिविरमा ५ सय १५ जनाले उपचार सेवा लिएका हुन् ।

कपिल आरोग्य मन्दिर कपिलधाम र वेष्ट्रन नेपाल डेभलभमेन्ट ट्रष्टको आयोजना तथा वुटवल लायन्स आँखा अस्पतालको प्राविधिक सहयोगमा शिविर संचालन गरिएको ट्रष्टका सचिव पदम घिमिरेले बताए । उनले वेष्ट्रन नेपाल डेभलभमेन्ट ट्रष्ट शिक्ष, स्वास्थ्य र वातावरण क्षेत्रमा क्रियाशिल रहेको जानकारी दिए । ट्रष्टले लुम्बिनी प्रदेशका विभिन्न क्षेत्रमा स्वास्थ्य शिविर संचालन गरिरहेकाले धेरै विरामी लाभान्वीत भएको बताए ।

यस्तै ट्रष्टका सल्लाहकार विष्णु घिमिरेले बाणगंगाको यस क्षेत्रमा गरिएको शिविरले यहाँका थुप्रै आखाँका विरामीहरु लाभान्वीत भएको बताए । उनले भने “विभिन्न क्षेत्रमा संचालन हुने यस्ता शिविरले विरामीलाई त फाईदा पुगेको छ नै, ट्रष्टलाई पनि अझै शेवाको भाव जागेको छ ।”

शिविरमा औषधि र चश्मा निःशुल्क प्रदान गरिएको थियो । जाँच गराएकाहरु मध्ये ५६ जनाको आँखामा मोतिया विन्दुको समस्या देखिएको उपचारमा संलग्न चिकित्सकहरुले बताएका छन् । मोतियाविन्दुको समस्या देखिएकाहरुलाई भने अप्रेशनका लागि बुटवल लायन्स आँखा अस्पतालमा बोलाइएको छ ।

बाणगंगाका आँखाका बिरामीहरुलाई लक्षित गरी उक्त शिविरको आयोजना गरिएको थियो । मौसमी प्रतिकुलतका बिच पनि विरामीलाई सेवा दिन सकिएको धामका अध्यक्ष शंकर प्रसाद आचार्यले बताउनुभयो । आँखाको समस्या भई उपचारका लागि शिविरमा आएका बिरामीहरुलाई चेकजाँच गरी चश्मा समेत निशुल्क प्रदान गरिएको थियो । लायन्स आखाँ अस्पतालका आँखा रोग विशेषज्ञ सहित वेष्ट्रन नेपाल डेभलभमेन्ट ट्रष्टका पदाधिकारीहरुको शिविरमा उपस्थिति रहेको थियो ।