सामन्तवादको अवशेष मिटरब्याजी, पीडितको समस्या समाधान गर्न सरकार प्रतिबद्ध छः गृहमन्त्री श्रेष्ठ

काठमाडौँ, १९ चैत्र । उपप्रधान तथा गृहमन्त्री नारायणकाजी श्रेष्ठले मिटरब्याजी पीडितको समस्या कुनै पनि हालतमा समाधान गर्न सरकार प्रतिबद्ध रहेको बताएका छन् । आइतबार प्रतिनिधिसभाको बैठकमा सरकारले मिटरब्याजी पीडितसँग गरेको सहमतिबारे जानकारी गराउँदै मन्त्री श्रेष्ठले मिटरब्याजी र पीडितहरूबारे अध्ययन गर्न आयोग बनाउन लागेको जानकारी दिए ।

उनले भने– ‘हामीले मूलभूत रूपमा सामन्तवादलाई अन्त्य गरे पनि यो दुःखद कुरा हो कि एक्काइसौँ शताब्दीको लोकतान्त्रिक व्यवस्थामा पनि नेपालमा सामन्तवादको अवशेष अत्यन्तै गम्भीर रूपमा विद्यमान छ । त्यो अवशेषको एउटा रूप मिटरब्याजी पनि हो । सतहमा पीडितहरूले सडकमा आन्दोलन पनि गरिरहेका छन् र समाधानका लागि सरकारले समाधानको पहल पनि गरिरहेको छ तर त्यो पर्याप्त भएन । त्यसकारण यो समस्यालाई कुनै हर हालतमा हामीले समाधान गर्नै पर्छ । जुन नागरिक मिटरब्याजीको पीडामा परेका छन्, तिनीलाई न्याय दिनुपर्ने छ । त्यसकारण यो मिटरब्याज पीडितहरूको आन्दोलनप्रति र उहाँहरूको आवाजप्रति सरकार पूरै गम्भीर रहेको छ ।’

उनले केही वर्षपहिले सर्लाहीमा भएको मिटरब्याज पीडितहरूको आन्दोलनमा आफू पनि सहभागी भएको स्मरण गरे । उनीहरूको नेतृत्व गर्दै आफू नै विभिन्न मिडियाको दैलो दैलोमा पुगेको उनले बताए । त्यतिबेला मिटरब्याजीहरुको तमसुक च्यात्न सफल भएको उनले बताए । उनले मिटरब्याजको अवस्थाको बारेमा जाँचबुझ र छानबिनका लागि आयोग नै बनाउने तयारी गरिरहेकोबारे संसद्लाई जानकारी गराए ।