घाँस काट्न गएकी महिलालाई बाघले लग्यो, खोजीकार्य जारी

कञ्चनपुर, ०८ वैशाख । कञ्चनपुरमा घाँस काट्न गएकी एक जना महिलालाई बाघले लगेको छ । बेलौरी नगरपालिका वडा नम्बर ८ पचुँइकी गंगादेवी चन्द बेपत्ता हुनुभएको जिल्ला प्रहरी कार्यालय कञ्चनपुरले जनाएको छ ।

नेपाल–भारत सीमा क्षेत्र नजिकै पर्ने खप्टिनालामा घाँस काट्ने क्रममा चन्दलाई बाघले लगेको हो । उहाँसँगै रहेका अरू महिलाहरू भने भागेका छन् । बेपत्ता चन्दको खोजी भइरहेको प्रहरीले जनाएको छ । बाघ भगाउन प्रहरीले हवाई फायरसमेत गरेको थियो ।