उद्योगमा भएको दुर्घटनामा १३ मजदुर घाइते : धरापमा परे २ महिला

पाल्पा ५ साउन ।पाल्पाको सर्देवास्थित सिजी सिमेन्ट कम्पनीभित्रको चेन चुँडिदा १३ जना कामदार घाइते भएका छन् । बुधबार बेलुकी पौने ४ बजेतिर सिजी सिमेन्ट कम्पनीमा इटा वारपार गर्न बनाइएको चेन चुँडिदा १३ फिट माथिबाट खसेर १३ जना कामदार घाइते भएका हुन् ।घाइते हुनेमा रैनादेवी छहरा– ३, का पदम सोमै, सोही स्थानका चिन्तबहादुर डंगोल र भुवनपोखरीकै सुमन नेपाली रहनुभएको छ । यस्तै नवलपरासी सुनवलका लिलबहादुर गुरुङ्, कपिलवस्तुका महेश बराम, कमल पासी, उमेश पासी, रुपन्देही देवदहका यमबहादुर विक, सोहनलाल जैसी र अक्सर मिसर रहनुभएको छ ।
घाइतेहरूको अहिले लुम्विनी मेडिकल कलेज प्रभासमा उपचार भइरहेको छ । घाइतेमध्ये केहीको अवस्था गम्भीर र केहीको अवस्था मध्यम् रहेको जिल्ला प्रहरी कार्यालय पाल्पाका प्रहरी निरीक्षक भुपेन्द्र थापाले जानकारी दिनुभयो । अधिकांश उपचारपछि डिस्चार्ज भएको अस्पतालले जनाएको छ । १३ जनामध्ये तीन जना भने उपचार नगरी घरतर्फ लागेको बताइएको छ । तर कसरी चुँडियो भन्ने अनुसन्धान भइरहेको छ ।
यता तानसेन–७, लामीडाँडामा मकै जोगाउन थापिएको विद्युतीय धरापमा परी दुई जना महिला गम्भीर घाइते भएका छन् । मकै जोगाउन बाँदरलाइ स्थानीय सोम आलेको बारीमा थापिएको विद्युतीय धरापमा परी दुई जना महिला घाइते भएका हुन् ।घाइते हुनेमा स्थानीय ३१ वर्षकी विजिता आले र ३८ वर्षकी तिलु थापा रहेको जिल्ला प्रहरी कार्यालय पाल्पाका प्रहरी निरीक्षक भुपेन्द्र थापाले जानकारी दिनुभयो । बुधबार दिउँशो पौने ४ बजेतिर बारीमा घाँस काट्न जाने क्रममा उनीहरू धरापमा परेको उहाँले बताउनुभयो ।घाइते दुबैको अवस्था गम्भीर रहेको र हाल लुम्विनी मेडिकल कलेज प्रभासमा उपभार भइरहेको छ । घटनाबारे थप अनुसन्धान भइरहेको प्रनि थापाले जानकारी दिनुभयो ।