गृहमन्त्री र अर्थमन्त्रीको राजीनामा माग्ने अवस्था आई सक्यो : प्रदिप पौडेल

बुटवल १५ साउन । नेपाली कांग्रेसका केन्द्रीय सदस्य एवं प्रतिनिधि सभा सदस्य प्रदीप पौडेलले सुन तस्करी प्रकरणमा गहिराइसम्म पुगेर अनुसन्धान भएर मालिक पत्ता नलागे गृहमन्त्री र अर्थमन्त्रीको राजीनामा माग्नुपर्ने अवस्था आउने बताउनु भयो । नेपाल प्रेस युनियन रुपन्देहीद्धारा आइतबार बिहान बुटवलमा आयोजित पत्रकार भेटघाटमा पौडेलले सुन तस्करी प्रकरणमा अनुसन्धान नभए गृहमन्त्री र अर्थमन्त्रीको राजीनामा माग्नुपर्ने अवस्था आउने बताउनुभयो । सुन तस्करी प्रकरणमा भरिया मजदुरलाई देखाएर उम्किन नमिल्ने भन्दै उनले गहिराइसम्म पुगेर अनुसन्धान हुनुपर्ने बताउनुभयो । भ्रष्टाचारविरुद्ध पार्टीले आक्रामक ढंगले आवाज नउठाए जनताले साथ नदिने उहाँको भनाइ छ ।संघीयता खारेज गर्ने नभई कम खर्चिलो र जनतालाई छिटो छरितो सेवा प्रवाह गर्ने चुस्त दुरुस्त बनाउन जरुरी रहेको भन्दै नेता पौडेलले केन्द्रदेखि प्रदेशसम्मका सांसद र मन्त्री तथा कर्मचारीको संख्या घटाउनुपर्ने बताउनुभयो ।