‘श्रीनगर सांस्कृतिक डबली’सञ्चालनमा आउन किन सकेन ?

पाल्पा २५ भदौ लुम्बिनी प्रदेश सरकारको करिब सात करोड रुपियाँको लगानीमा डेढ वर्षअघि तयार भएको ‘श्रीनगर सांस्कृतिक डबली’ (खुला नाचघर) सञ्चालनमा आउन सकेको छैन । सञ्चालनमा नआउँदै डबलीका संरचना जीर्ण बनेका छन् ।आन्तरिक र बाह्य पर्यटकलाई आकर्षित गर्ने उद्देश्यले निर्माण गरिएको सांस्कृतिक डबली सञ्चालनमा प्रदेश सरकारले नै बेवास्ता गर्दा बनेको संरचना बिग्रिँदै गएको हो । डबली सञ्चालन गर्न कार्यविधि र निर्देशिका बनाउन प्रदेश सरकारको ध्यान पुगेको छैन । प्रदेश सरकारको बेवास्ताका कारण जनताको राजस्वबाट भएको लगानी खेर जान लागेको स्थानीय बासिन्दाले बताएका छन् ।
बनेको डबलीभित्र झार उम्रिएका छन् । संरचनामा समेत क्षति पुगेको छ । तर लामो समयसम्म पनि प्रदेश सरकारले सांस्कृतिक डबली सञ्चालन गर्नेबारेमा निर्णय गर्न नसकेको तानसेन नगरपालिकाले जनाएको छ । तानसेनमा सांस्कृतिक डबली बन्नु राम्रो भए पनि लामो समयसम्म सञ्चालन नहुँदा नगरपालिकामाथि पनि प्रश्न उठेको नगरपालिकाका सूचना अधिकारी भरत आचार्यले बताउनुभयो । तानसेन नगरपालिकाले डबली सञ्चालन गर्न दिनु भनेर प्रदेश सरकारलाई पत्र पठाए पनि त्यसको जवाफ नआएको उहाँले उल्लेख गर्नुभयो । विसं. २०७७ असारदेखि सुरु भएको सांस्कृतिक डबली निर्माण सम्झौताको म्यादभन्दा एक वर्ष ढिला गरी डेढ वर्षअघि सकिएको थियो । लुम्बिनी प्रदेश सरकारको लगानी छ करोड ८१ लाख रुपियाँ लगानीमा सांस्कृतिक डबली निर्माणको भएको थियो । सांस्कृतिक डबलीभित्र स्टेडियम, कफी हाउस, पार्किङ स्थल, बाउन्ड्री, बस्ने स्थल, हरियाली बगैँचा निर्माण गरिएको छ । तर ती संरचनामा अहिले झार उम्रिएका छन् ।