कपिलवस्तुमा १० हजार ब्रोइलरका चल्ला नष्ट

कपिलवस्तु, १७ असोज। कपिलवस्तु प्रहरीले भारतबाट अवैध रुपमा भित्राइएका ब्रोइलर कुखुराको चल्ला नष्ट गरेको छ । कृष्णनगर नगरपालिका–४ सिर्सिहवाबाट चोरी पैठारी भएको चल्ला इलाका प्रहरी कार्यालय कृष्णनगरले नष्ट गरेको छ ।

तस्करले भारतबाट निकासी पैठारी गरी नेपालतर्फ ल्याउँदै गरेको अवैध चल्ला नष्ट गरिएको कृष्णनगरका इलाका प्रहरी कार्यालय कपिलवस्तुका प्रहरी निरीक्षक लक्ष्मण ओलीले बताउनु भयो ।

बरामद गरिएको कुखुराका चल्लाको अन्दाजी मूल्य सात लाख ५० हजार रहेको बताइएको छ । मङ्गलबार बिहान तस्करी गरेको अवस्थामा प्रहरी गस्ती टोलीले फेला पारेपछि तस्करले चल्ला छाडेर भारत तर्फ भागेका थिए । बरामद गरिएको चल्ला खाडलमा पुरेर नष्ट गरिएको छ ।