तरकारी र प्याज अनुदान दिएर वितरण

पाल्पा १४ कार्तिक । रामपुर नगरपालिकाले कृषकहरुलाई ५० प्रतिशत अनुदानमा तरकारी र प्याजको वेर्ना वितरण गरेको छ । नगरपालिकाले उत्पादन गरेको काउली, ब्रोकाउली, बन्दा र प्याजका वेर्ना वितरण गरेको हो ।बजार मूल्यको ५० प्रतिशत अनुदानमा एभरेष्ट ग्रीन जातको ब्रोकाउली, सुपर ह्वाईट टप जातको काउली, ग्रीन टप बन्दा, रेड क्रियोल र नासिक–५३ जातको प्याजको वेर्ना कृषकहरुलाई वितरण गरेको नगरपालिकाले जनाएको छ । ब्रो काउली प्रति वेर्ना ३ रुपैयाँ, काउली र वन्दा २ रुपैयाँ ५० पैशामा वितरण गरेको छ । यस्तैगरी प्याजको वेर्ना १ रुपैयाँको १० वटाका दरले वितरण गरिने छ । सोमबार ब्रोकाउली २ हजार ३ सय १ , काउली २ हजार ६ सय ८९ र बन्दा २ हजार ६ सय ५५ गरी जम्मा ७ हजार ६ सय ४५ वटा वेर्ना सहुलियत दरमा कृषकले पाएपछि खुशी भएका छन् ।
कृषकहरुको माग र आवश्यकताका आधारमा नगरपालिकाले वेर्ना अनुदानमा वितरण गरेको हो । नगरपालिकाले अहिले करिब ४० हजार ब्रोकाउली, काउली र बन्दाको वेर्ना वितरण गर्ने योजना बनाएको छ । कृषकहरुको मागको आधारमा कार्तिक १८ गते सम्म अनुदानमा वेर्ना वितरण गरिने रामपुर नगरपालिका कृषि शाखाका जेटिए युवराज नेपालीले जानकारी दिनुभयो । कृषकले खेती गर्ने क्षेत्रको आधारमा वेर्ना उपलब्ध गराइने छ । नगरपालिकाले प्याजको वेर्ना भने कार्तिक २० गते देखि वितरण गर्ने जनाएको छ ।