धर्म र जातका नाममा अराजकता मच्चाउदा सरकार रमिते : चित्रवहादुर

तिलोत्तमा ३ पुस। राष्ट्रिय जनमोर्चाका अध्यक्ष एवं पूर्व उपप्रधानमन्त्री चित्रबहादुर केसीले लोकतन्त्रको विकल्प अन्य व्यवस्था हुन नसक्ने बताएका छन् । उनले देशमा धर्मका नाममा अराजकता मच्चाउने काम भएको जनाए ।मंगलबार बुटवलमा रिपोर्टर्स क्लब नेपाल लुम्बिनी प्रदेशले गरेको साक्षात्कार कार्यक्रममा बोल्दै उनले हिन्दुधर्मको वकालत गरिनु राजतन्त्रको वकालत गरेको ठहर्ने बताए । प्रतिनिधिसभा सदस्य समेत रहेका केसीले लोकतन्त्र र गणतन्त्रको विरूद्ध आवाज उठ्नु लोकतन्त्र ल्याउनेले गतिलो काम नगरेको पुष्टि भएको पनि बताएका छन् ।

प्रदेशलाई खारेज गरी स्थानीय तहहरुलाई आवश्यक अधिकार दिएर बलियो बनाउन सके विकास गर्न सकिने उनको तर्क थियो ।लोकतान्त्रिक पद्धतिमा सुशासन कायम हुनुपर्नेमा कुशासनको दिशामा जानुले जनतामा वितृष्णा छाएको केसीले बताए । नेता केसीले गठबन्धन सत्तामा जानका लागि मात्र गर्न नहुने बताउँदै ५ दलीय गठबन्धनले ७२ को संविधान जोगिएको दाबी गरे । उनले गठबन्धनमा भएको सम्झौतालाई अक्षरसः पालना गरेर अगाडि बढ्न समेत दलहरुलाई सुझाव दिए ।