मृत्यु भएकाको नाममा वृद्धभत्ता खाएको आरोप लागेका ५ सचीवलाई बिशेष अदालतको सफाइ

बुटवल १९ पुस ।तत्कालीन ५ जना गाविस सचिवले सफाई पाएका छन् ।विशेष अदालतले मृत्यु भइसकेका व्यक्तिको नाममा वृद्ध भत्ता खाएको आरोप लागेका उदयपुरको रामपुर ठोक्सिलाका तत्कालीन गाविस सचिवहरूलाई सफाई दिएको हो ।विशेष अदालतले बुधबार उनीहरूलाई सफाइ हुने फैसला सुनाएको हो । अध्यक्ष टेकनारायण कुँवरसहित तेजनारायणसिंह राई र रितेन्द्र थापाको इजलासले तत्कालीन गाविस सचिवहरू केशवप्रसाद आचार्य, लोकेन्द्र कार्की, विशाल सुन्दास, माधवप्रसाद खतिवडा र पुष्पराज सिग्देललाई आरोपबाट सफाइ दिएको हो ।

आचार्यविरुद्ध ९ लाख ९० हजार ५ सय, कार्कीविरुद्ध ७८ हजार, सुन्दासविरुद्ध ७२ हजार, खतिवडाविरुद्ध ३ लाख १४ हजार र सिग्देलविरुद्ध एक लाख ७६ हजार बिगो दाबी गर्दै अख्तियार दुरुपयोग अनुसन्धान आयोगले २०७८ असोज १२ गते विशेष अदालतमा अभियोग पत्र दायर गरेको थियो ।