कपिलवस्तु, ०८ माघ । त्रेतायुगमै नेपाल र भारतको सांस्कृतिक सम्बन्ध जोडिएको छ र सोही सम्बन्धका कारण अयोध्यामा उत्सव छाएका बेला नेपाल सँगै कपिलवस्तु पनि उल्लासमय बनेको छ । अयोध्या स्थित राम मन्दिरमा भगवान श्री रामको प्राण प्रतिष्ठाको आयोजना हुँदै गर्दा सोमवार कपिलवस्तुको सदरमुकाम तौलिहवा, कृष्णनगर, पकडी, लवनि लगायतका स्थानहरूमा धुमधामका साथ धार्मिक –र्याली तथा धार्मिक पुजा गरिएको छ । नगरक्षेत्रमा विभिन्न धार्मिक समूहहरूले सामूहिक पूजापाठ तथा विभिन्न धार्मिक कार्यक्रमको आयोजना गरेका छन् । कपिलवस्तुमा रहेका हरेक मठमन्दिरलाई सजावट गरी आकर्षक पारिएको छ । मुख्य बजार क्षेत्रका सडकका साथै घरघरमा ‘जय श्रीराम’ लेखिएको झन्डा झुन्ड्याइएको छ । नगरका घरघरमा सोमबार साँझ दियो बालेर दीपावली पनि मनाउने तयारी गरिएको छ । भारतको राम मन्दिरमा हुने प्राण प्रतिष्ठाको अवसरमा यहाँका सनातनवादी आम सर्वसाधारणमा ठुलो उत्साहको लहर देखिएको छ । तौलिहवा बजारलाई गेरुवा रङ्गको जय श्री राम, हनुमान जी का झण्डा पताकाहरूलाई रङ्गाइएको छ । बजार क्षेत्रमा ठूला ठूला झण्डा तथा ब्यानरहरू टाँसिएका छन् ।
श्री तौलेश्वरनाथ महादेव मन्दिर, राम जानकी मन्दिर, समयमाई मन्दिर, चन्द्र घण्टा दुर्गा मन्दिर लगायतका सबै मन्दिरहरूमा सोमवार प्राण प्रतिष्ठाको अवसरमा धार्मिक पुजा तथा अनुष्ठान को आयोजना गरिएको छ ।
सोमवार तौलेश्वरनाथ महादेवको मन्दिरबाट सनातनी धर्मावलम्वीहरूको ५० हजार बढी सङ्ख्यामा धार्मिक जुलुस निकालिएको थियो । तौलिहवा बजार परिक्रमा गरिएको छ । सो अवसरमा साँझ हरेक सनातनी धर्मावलम्बीहरूले घर घरमा दिपावली समेत गरिएको छ ।
जिल्लाका ८ वटा स्थानीय तहले स्थानीय तहमा सार्वजनिक बिदा दिएर सर्वसाधारणलाई भगवान रामको प्राण प्रतिष्ठाको खुशियाली मनाउन आह्वान गरेका छन् । सो दिन मासु तथा मदिराजन्य वस्तुहरूको सेवन तथा बिक्री वितरणमा समेत रोक लगाइएको छ । सोमवार २२ जनवरीका दिन भगवान श्री राम अयोध्यामा ४ सय ९२ वर्ष पछि पुर्नस्थापित भएको छ ।
प्रतिक्रिया