बाणगंगामा ३४ हजार ४ सय १२ बालबालिकालाई खोप

सरिता थारु
कपिलबस्तु १८ फागुन । कपिलबस्तुको बाणगंगा नगरपालिकामा शुक्रबार देखि दादुरारुवेला विरुद्धको खोप अभियान सुरु भएको छ । शुक्रबार एकै साथ पालिकाको ३ स्थान वडा नंं २ को जनता मावि पिपरा, ८ को युनाईटेड स्टुडेन्ट एकेडेमि चपरगाँउ र वडा नंं ११ को हेमराज मावि हथौसाबाट खोप अभियानको सुरुवात गरिएको स्वास्थ्य शाखा प्रमुख ठगराज पौडेलले जानकारी दिनुभयो । दादुरा–रुवेलाको जोखिमबाट आफ्ना बालबालिकालाई बचाउनका लागि अभिभावकहरु सचेत बनेर खोप लगाउन लाग्नुपर्ने उहाले बताउनुभयो । सानो लापरवाहीले पछि ठुलो क्षति समेत हुने जोखिम भएकाले त्यसतर्फ समयमै सचेत हुनुपर्ने उहाको भनाई छ ।
९ महिना देखि १५ बर्ष सम्मका कुल ३४ हजार ४ सय १२ बालबालिकालाई खोप लगाउने बाणगंगा नगरपालिकाको लक्ष्य रहेको छ । खोप लगाउनका लागि नगरपालिका भित्र ९५ वटा खोप केन्द्र निर्धारण गरिएको छ । खोप अभियानमा खोप कार्यकर्ता २८ जना, ५५ जना अन्य स्वास्थ्यकर्मी ,१ सय १२ जना महिला स्वास्थ्यस्वयमसेविका र अन्य विद्यालयका शिक्षक स्वयमसेवक गरि कुल ३ सय ९ जना जनशक्ति परिचालित भएको स्वास्थ्य शाखा अधिकृत भक्तिराम पाण्डेले जानकारी दिनुभयो । साथै उहाले नगरबासीमा उमेर समुह पुगेका आफ्ना सबै बालबालिकालाई खोप लगाउनुहुन अभिभावकसंग आग्रह समेत गर्नुभयो ।