आयुर्वेद उपचार सेवा लिने सेवाग्राही वृद्धि

कपिलवस्तु, २१ जेठ । कपिलवस्तुको विजयनगर गाउँपालिकामा रहेको गणेशपुर आयुर्वेद औषधालयमा स्वास्थ्य सेवा लिनेको सङ्ख्या बढेको छ । गाउँपालिकाको वडा ७ प्रसोहियामा रहेको औषधालयमा कृष्णनगर र भारतबाट स्वास्थ्य सेवा लिन आएपछि सेवा लिनेको सङ्ख्यामा वृद्धि भएको हो ।

केही वर्ष अघिसम्म आयुर्वेदप्रति खासै मानिसको चासो थिएन । अहिले दैनिक ३० देखि ५० जनासम्म चेकजाँच गर्न आउने गरेका छन् । आयुर्वेद स्वास्थ्यमा जनताले चासो दिन थालेका छन् । निःशुल्क उपचार र अन्य उपचार गरी निको नभएका बिरामीको रोजाइका कारण सेवा लिनेको सङ्ख्या बढ्दै भएको विमला चौधरीले बताउनुभयो ।

आयुर्वेद उपचार पद्धतिको प्रचारप्रसार गर्न सबै वडामा घुम्ती शिविर सञ्चालन, निःशुल्क औषधी उपचार, गाउँघर क्लिनिक व्यवस्था गरिएको विजयनगर गाउँपालिका अध्यक्ष गोपालबहादुर थापाले बताउनुभयो । उपचारका लागि आउनेमा अधिकांश पायल्स, ढाडको समस्या, जन्डिस, ग्यास्ट्रिक, दम, खोकी, हाड जोर्नी, नसा, आवाज रोकिने, बाथ, अम्लपित्त लगायत बिरामी छन् ।