अनधिकृत रूपमा औषधि बिक्री गर्ने दुई जना बुटवलबाट पक्राउ

बुटवल, २४ जेठ । बुटवलमा अनधिकृत रूपमा औषधि बिक्री गर्ने दुई जनालाई जिल्ला अनुगमन समितिले नियन्त्रणमा लिएको छ । रुपन्देहीको सिद्धार्थनगर नगरपालिका–३, रानीगाउँबाट बिहीबार संयुक्त जिल्ला अनुगमन समितिले दुई जनालाई पक्राउ गरेको हो ।

पक्राउ पर्नेमा आयशा फार्मेसीका दीप केवट र विनायक फार्मेसीका रामहरि आचार्यलाई नियन्त्रणमा लिइएको रुपन्देहीका सहायक प्रमुख जिल्ला अधिकारी रामचन्द्र अर्यालले जानकारी दिए ।

आयशा रामनरेश प्रसाद मल्लाह र विनायक तारा भण्डारीको नाममा दर्ता रहेका फार्मेसी हुन् । अर्कैको नाममा दर्ता भएपनि केवट र आचार्यले आफ्नो अध्ययनभन्दा बाहिर गएर औषधि जस्तो नागरिकको स्वास्थ्यसँग सम्बन्धित विषयमा खेलबाड गरेको पाइएपछि नियन्त्रणमा लिएर अनुसन्धान सुरु गरिएको अर्यालले बताए ।

अनुगमन समितिले उक्त क्षेत्रमा रहेका होटेल तथा रेस्टुरेन्टमा समेत अनुगमन गरेको थियो । अनुगमनका क्रममा नवीकरण नभएका, मूल्य सूची अपडेट नगरिएको र सरसफाइमा ध्यान नदिएको पाइएपछि सुधार गर्न निर्देशन दिइएको उनले बताए । यस्तै नवीकरण नभएका होटेल तथा रेस्टुरेन्टलाई समेत एक हप्ताभित्र नवीकरण गर्न निर्देशन दिइएको अर्यालले बताए ।