तिनाउ खोलामा नुहाउन गएका भारतीय युवकको डुबेर मृत्यु

बुटवल, २६ जेठ । पाल्पाको तिनाउ गाउँपालिका झुम्सास्थित तिनाउ खोलामा डुबेर शनिबार एक युवकको ज्यान गएको छ । अन्य दुई जना साथीहरूसँगै खोलामा नुहाउन गएका ती युवक डुबेपछि उद्धार गरी उपचारका लागि बुटवलको लुम्बिनी प्रादेशिक अस्पतालमा ल्याइएको थियो ।

अस्पतालका चिकित्सकले उनलाई मृत घोषणा गरेको जिल्ला प्रहरी कार्यालय पाल्पाले जनाएको छ । प्रहरीका अनुसार मृत्यु हुनेमा भारतको कानपुर जिल्लाका ३५ वर्षीय फहिम अहमद रहेका छन् ।

दिउँसो करिब १२ बजे खोलामा गएका अहमद पानीमा डुबेपछि उनीसँगै गएका दुई जना साथीहरूले उद्धार गरेका थिए । घटनाबारे थप अनुसन्धान जारी रहेको प्रहरीले जनाएको छ ।