देउवाको प्रस्तावले माधब नेपाल अफ्ट्यारोमा

काठमाडौं १९ असार । नेपाल कम्युनिष्ट पार्टी ९एकीकृत समाजवादी० का अध्यक्ष माधवकुमार नेपाल र नेपाली कांग्रेसका सभापति शेरबहादुर देउवाबीच भेटवार्ता भएको छ । अध्यक्ष नेपाल र सभापति देउवाबीच बूढानीलकण्ठस्थित देउवा निवासमा भएको भेटवार्तामा पछिल्लो राजनीतिक विकासक्रमबारे छलफल भएको एकीकृत समाजवादीका नेता आलोक रायमाझीले जानकारी दिए ।

सभापति देउवाले नेपाली कांग्रेस र नेकपा ९एमाले० बीच राष्ट्रिय सहमतिको सरकार गठन गर्ने सम्बन्धमा भएको सहमतिबारे अध्यक्ष नेपाललाई जानकारी दिँदै त्यसमा सामेल हुन प्रस्ताव गरेको नेता रायमाझीले जनाए । नेता रायमाझीका अनुसार अध्यक्ष नेपालले सभापति देउवाद्वारा प्रस्तुत प्रस्तावमाथि पार्टीमा छलफल गरेर जानकारी दिने बताए । देउवाको प्रस्तावलाई स्वीकार गर्दा नेकपा एसले एमाले अध्यक्ष केपी शर्मा ओलीलाई प्रधानमन्त्री स्वीकार्नु पर्नेछ भने ओलीलाई प्रधानमन्त्री स्वीकार नगरे सरकार बाहिर बस्नु पर्नेछ ।

यसअघि ओलीविरुद्ध उत्रिएर अध्यक्ष नेपालले एमाले विभाजन गर्दै एकीकृत समाजवादी पार्टी बनाएका थिए । आफूले विभाजन गरेको पार्टीकै अध्यक्षलाई प्रधानमन्त्री मान्ने कि सरकार बाहिरै बस्ने भन्ने कुराले अध्यक्ष नेपाल अप्ठ्यारोमा परेका छन् । यसो त एमाले–कांग्रेसको नयाँ गठबन्धनका विषयमा पहिलो प्रतिक्रिया दिंदै नेकपा एसले दुई ठूलो पार्टीको सरकार लोकतन्त्रका लागि खतरा हुने बताएको छ । उसले कांग्रेस–एमालेको सहमतिलाई तानाशाही शासन चलाउने आशंकाको रुपमा हेर्दै प्रारम्भिक प्रक्रिया जनाएको छ । कांग्रेस र एमालेबीच अध्यक्ष ओलीलाई प्रधानमन्त्री बनाएर नयाँ सरकार बनाउने सहमति भएको छ।