लमही, २६ साउन । दुई जना महिलाको सामान्य ज्वरोका कारण राजपुर नाका जेलबाङखोलामा मृत्यु भएपछि स्वास्थ्यकर्मी परिचालन गरिएको छ । उक्त नाकामा गत शनिबार र मंगलवार गरि दुई जना स्थानीयको मृत्यु भइसकेको छ ।
मंगलवार मृत्यु भएकी दिलशरालाई नेपालगन्ज मेडिकल कलेजले औलो ज्वरोका कारण मृत्यु भएको पुष्टि गरेको थियो । सोही स्थानमा अन्यमा पनि ज्वरो फैलिएकोले स्वास्थ्यकर्मी पठाएको जिल्ला प्रशासन कार्यालय दाङले जनाएको छ ।
दाङको भैंसाही नाकामा औलो संक्रमण फैलिएपछि स्वास्थ्य कार्यालय दाङ र राजपुर गाउँपालिकाको स्वास्थ्यकर्मीको टोली परिचालन गरिएको छ जिल्ला प्रमुख रामबन्दु सुबेदीले बताए । जिल्लावाट जाने सडक अबरुद्ध हुँदा नेपालको बाटो भएर घटनास्थलमा जान नसक्ने अवस्था भएपछि उनीहरू कोइलावास नाका भएर भारतको बाटो हुँदै भैंसाही नाकामा स्वास्थ्यकर्मीको टोली जान थालेको हो ।
भैंसाही नाकामा ज्वरो आएका बिरामी दश जना भन्दा बढी छन् । औंलो संक्रमण फैलिएकाले उपचार टोली परिचालन गरिएको स्वास्थ्य कार्यालय दाङले जनाएको छ ।
औंलो लामखुट्टेको टोकाइका कारणले लाग्ने रोग हो । औलो लागेका बेलामा ज्वरो आउने, थकान महशुस हुने, बान्ता हुने र टाउको दुख्ने जस्ता सामान्य लक्षणहरू देखापर्छ । यो रोगले गम्भीर रूप लिएमा छाला पहेँलो हुने, सिजरहरू आउने, कोमामा जाने वा मृत्यु हुने सम्भावना हुन्छ ।
लामखुट्टेले टोकेर परजीवी शरीरमा प्रवेश गर्यो भने त्यसको १० देखि १५ दिनमा लक्षणहरू देखिन सुरु हुन्छ । औलोको राम्रोसँग उपचार गरिएन भने केही महिनापछि दोहोरिन पनि सक्ने जोखिम रहने स्वास्थ्य कार्यालयले जनाएको छ ।
लुम्बिनी प्रदेशमा देसभरिको औलो रोगीको तथ्यांक मध्य ६० प्रतिशत लुम्बिनीमा रहेको स्वास्थ्य निर्देशनालय प्रमुख डा। बिनोद सिह गिरीले बताए । लुम्बिनीको तथ्यांकले नेपाल सरकारले अगाडि सारेको सन २०२५ सम्म औलो रोग उल्लमुलनको रणनीति माथी चुनौती थपिएको उनले बताए ।
प्रतिक्रिया