राप्ती स्वास्थ्य विज्ञान प्रतिष्ठानमा पहिलो पटक एमबीबीएस पढ्ने ब्यबस्था

पन्देही १० कार्तिक । चिकित्सा शिक्षा आयोग काठमाडौंले ३७ जना एमबीबीएस पढ्ने विद्यार्थीलाई भर्नाको लागि दाङको घोराहीस्थित राप्ती स्वास्थ्य विज्ञान प्रतिष्ठानमा पठाएको छ । आयोगले कलेज म्याचिङ गर्दै पूर्ण छात्रवृत्तिमा एमबीबीएस पढ्ने विद्यार्थीलाई भर्नाका लागि पठाएको हो ।

विद्यार्थी भर्नाको तयारी प्रतिष्ठानले गरिसकेको रजिस्ट्रार प्राध्यापक श्याम लम्सालले बताए । यस वर्षबाट प्रतिष्ठानमा एमबीबीएस पढाइ सुरु हुने भएपछि छात्रवृत्तिमा पढ्ने विद्यार्थीहरु आउन लागेका हुन्चिकित्सा शिक्षा आयोगले एमबीबीएस पढाइ सञ्चालनका लागि ५० सीट सुनिश्चित गरेको छ । जसमा ७५ प्रतिशत छात्रवृत्तिमा विद्यार्थीले पढ्न पाउने रजिष्ट्रार लम्सालले बताए । उनका अनुसार ४ जना विदेशी र ९ जना नेपालीले रकम भुक्तानी गरेर पढ्न पाउने छन् । आयोगबाट आउने नामावलीअनुसार भर्ना हुनेछन् ।

प्रतिष्ठानले करिब ७ बर्षपछि एमबिबिएस पठनपाठनका लागि आयोगबाट अनुमति पाएको हो । हाल प्रतिष्ठानमा बिएस्सी र बिएनएस नर्सिङ र चिकित्सकको एमडीको पठनपाठन भइरहेको छ । अब एमबीबीएस पढ्नकै लागि जिल्ला बाहिर जानुपर्ने अवस्थाको अन्त्य हुने भएको छ ।

‘एमबीबीएस पढाइ सञ्चालन गर्ने कुरा धेरै महत्त्वपूर्ण कुरा हो’, उनले भने, ‘दाङको चिकित्सा शिक्षामा यसले ठूलो र महत्वपूर्ण अर्थ राख्छ, दाङकै आर्थिक, सामाजिक विकासमा शैक्षिक कार्यक्रम सुरुवातले कोसेढुङ्गा सावित हुनेछ ।’

यसअघि लामो समय शैक्षिक कार्यक्रम सुरु नहुँदा यसलाई पूर्णरुपमा संचालनका लागि दवाव बढेको थियो । तर, अब वर्षेनि शैक्षिक कार्यक्रम थपिन थालेपछि जिल्लामा उत्साह थपिएको छ । राप्ती उपक्षेत्रीय अस्पताललाई राप्ती स्वास्थ्य विज्ञान प्रतिष्ठान बनाइएको हो ।