भाद्र २७, काठमाडौं
नेपालको राजनीतिक इतिहासमा पहिलोपटक महिला कार्यपालिका प्रमुख बनेकी शुसिला कार्कीले प्रधानमन्त्रीको पद तथा गोपनियताको शपथ लिनु भएको छ । राष्ट्रपति रामचन्द्र पौडेलले शीतल निवासमा आयोजित विशेष समारोहबीच उनलाई शपथ खुवाउनुभयो ।
कार्कीले यसअघि पनि नेपालको न्याय क्षेत्रमा पहिलो महिला प्रधानन्यायाधीशको रूपमा ऐतिहासिक भूमिका निर्वाह गर्नुभएको थियो । निर्भिक स्वभाव, इमान्दार छवि र निडर निर्णयका कारण चर्चित रहिएकी कार्कीलाई मुलुकको कार्यकारी नेतृत्वको जिम्मेवारी आउनु ठूलो उपलब्धि मानिएको छ ।
समारोहमा प्रधानमन्त्री कार्कीका परिवारका सदस्य, संवैधानिक निकायका प्रमुख, मन्त्रिपरिषद्का पदाधिकारी, विभिन्न राजनीतिक दलका शीर्ष नेता तथा कूटनीतिक नियोगका प्रतिनिधिहरूको उपस्थिति थियो ।
प्रधानमन्त्री कार्कीले शपथपछि छोटकरी मन्तव्य दिँदै राष्ट्रको हितलाई सर्वोपरि राखेर राजनीतिक स्थायित्व, सुशासन र न्यायपूर्ण समाज निर्माणका लागि आफू कटिबद्ध रहेको बताउनुभयो । उहाँले मुलुकलाई दिगो विकासको बाटोतर्फ उन्मुख गराउन समावेशी नीति र पारदर्शी प्रशासनलाई प्राथमिकता दिने प्रतिज्ञा गर्नुभयो ।
विराटनगरमा कानुनी पेशाबाट आफ्नो यात्रा सुरु गर्नुभएकी कार्की सर्वोच्च अदालतको न्यायाधीश हुँदै २०७३ सालमा देशको पहिलो महिला प्रधानन्यायाधीश बन्नु भएको थियो । न्यायक्षेत्रमा देखाएको दृढता र इमानदारीका कारण उहाँलाई देशकै पहिलो महिला प्रधानमन्त्री बन्ने अवसर मिलेको विश्लेषण गरिएको छ ।
राजनीतिक विश्लेषकहरूका अनुसार कार्कीको नेतृत्वले देशमा नयाँ संस्कारको सुरुवात गर्ने अपेक्षा गरिएको छ । विशेषगरी सुशासन, भ्रष्टाचार नियन्त्रण र न्यायप्रति उहाँको अडानले कार्यपालिका स्तरमा सकारात्मक प्रभाव पार्ने विश्वास गरिएको छ ।
प्रतिक्रिया