नवप्रभात सामुदायिक वन संरक्षण, विकास र सहकार्यको १५ वर्षे यात्रामा नयाँ ऊर्जा

बाणगंगा, कपिलवस्तु, कार्तिक १९

हरियो वन, हाम्रो धन—यही भावनालाई व्यवहारमा उतार्दै बाणगंगा नगरपालिका–८ स्थित नवप्रभात सामुदायिक वन उपभोक्ता समूहले आफ्नो १५औं वार्षिक साधारण सभा मंगलबार वनकै परिसरमा उत्साहपूर्वक सम्पन्न गरेको छ ।
सभामा वन संरक्षणसँगै समुदायको जीवनस्तर उकास्ने विभिन्न सृजनात्मक कार्यक्रम र उपलब्धिहरूको समीक्षा गर्दै आगामी वर्षका लागि चार करोड ८९ लाख ९७ हजार ७९५ रूपैयाँ बराबरको बजेट पारित गरिएको छ ।
साधारण सभामा मुख्य गरी आर्थिक पारदर्शिता, वृक्षरोपण अभियान, सामुदायिक भवन निर्माण, रोजगारीमुखी कार्यक्रम र महिला सशक्तीकरण मुख्य प्राथमिकतामा परेका छन् । वनले स्थानीय युवाहरुलाई खेलकुदतर्फ प्रोत्साहित गर्दै क्रिकेट ब्याट, बललगायत खेल सामग्री वितरण गरेको छ भने भजन मण्डलीहरूलाई मादल, खैजडी र मजुरा हस्तान्तरण गरी सांस्कृतिक जीवन्तता जोडिएको छ । सचिव सिता भुसालले प्रस्तुत गर्नुभएको वार्षिक प्रगति प्रतिवेदनमा वनले गत वर्ष वन क्षेत्र विस्तार, हेरचाह, नवीनीकरण र सामाजिक विकासमा उल्लेखनीय प्रगति गरेको विवरण प्रस्तुत गरिएको थियो ।

वनमै समृद्धिको आधार नगर प्रमुख चक्रपाणी अर्यालले सामुदायिक वन अब वातावरणीय सन्तुलनको मात्र होइन, स्थानीय अर्थतन्त्रको मेरुदण्ड बनेको बताउनु भयो । उहाँले भन्नुभयो —“दिगो वन व्यवस्थापनका लागि समुदायको अग्रसरता नै समृद्ध बाणगंगाको पहिचान हो । वनलाई नगरको प्राथमिक विकास क्षेत्रका रूपमा अघि बढाइनेछ ।”
नेपालको सफल मोडल डिभिजन वन कार्यालयका प्रमुख इश्वरी प्रसाद पौडेलले सामुदायिक वनलाई नेपालको सफल मोडेल भन्दै,“ वैज्ञानिक दृष्टिकोण र सहकार्यकै माध्यमबाट मात्र वनको दीगो उपयोग सम्भव छ,” ।

पारदर्शिता र आत्मविश्वासको उदाहरण वन अध्यक्ष डिल्लीराज रेग्मीले वनको आर्थिक गतिविधि, आय–आर्जनका कार्यक्रम र सुशासनप्रतिको प्रतिबद्धता उजागर गर्दै भन्नु भयो —
“हामी अख्तियारका उजुरीबाट विचलित हुने होइनौं, सुझाव र आलोचनालाई सुधारको अवसरका रूपमा लिन्छौं ।”

सभामा प्रस्तुत सबै प्रतिवेदनहरू सर्वसम्मत पारित गरिएका थिए । कार्यक्रममा स्थानीय जनप्रतिनिधि, सामुदायिक अगुवा, सरकारी अधिकारी, संघसंस्था र उपभोक्ताहरूको उत्साहपूर्ण सहभागिता थियो ।