महाराजगञ्जमा “पोषण मार्फत जीवन रूपान्तरण” परियोजना सम्पन्न, कुपोषण नियन्त्रणका प्रभावकारी पहल

रामजित तेली, महाराजगञ्ज, कात्तिक २५

महाराजगञ्ज नगरपालिकामा सोमबार “पोषण मार्फत जीवन रूपान्तरण परियोजना” सम्बन्धी कार्यक्रम सम्पन्न भएको छ। कार्यक्रम अन्तर्गत पालिका स्तरीय पोषण तथा खाद्य सुरक्षा निर्देशक समिति र परियोजना सल्लाहकार समिति बैठक सम्पन्न गरिएको थियो। बैठकमा नगरभित्र रहेका कुपोषित बालबालिकाको अवस्था, कारण र समाधानका उपायहरू बारेमा बृहत् छलफल गरिएको नगरपालिकाले जनाएको छ।
आर्थिक वर्ष २०८१÷८२ मा नगर क्षेत्रमा साम र माम वर्गका ४७८ जना बालबालिका कुपोषित अवस्थामा रहेका विवरण बैठकमा प्रस्तुत गरिएको थियो। सहभागीहरूले यस अवस्थाको गम्भीरता महसुस गर्दै, स्थानीय तहको योजनाबद्ध प्रयास, परिवारस्तरको सचेतना र नियमित पोषण अनुगमन मार्फत कुपोषण घटाउन सकिने निष्कर्ष निकालेको प्रमुख प्रशासकिय अधिकृत दिपेन्द्र रेग्मीले जानकारी दिनु भयो ।

स्वास्थ्य शाखा प्रमुखका अनुसार, उपचारका क्रममा रगत आवश्यक पर्ने कुपोषित बालबालिकाहरूका लागि नगरपालिका र बुटवलस्थित रेडक्रस सोसाइटीबीच सम्झौता गरिएको छ। यस सम्झौता अनुसार नगरवासी र नगरपालिका कर्मचारीले निःशुल्क रगत सेवा पाउने सुविधा पाउने भएका छन्।
नगर प्रमुखका अनुसार, “पोषण सुधार केवल स्वास्थ्यसँग मात्र होइन, जीवनशैली, सशक्त परिवार र सक्षम समुदायसँग पनि प्रत्यक्षरूपमा जोडिएको विषय हो। नगरपालिका अब प्रत्येक वडामा पोषण सचेतना र निगरानी अभियानलाई थप सशक्त बनाउने तयारीमा छ।”
यस परियोजनाबाट नगरपालिका र समुदायबीचको सहकार्य अझ सुदृढ बनेको छ। पोषण सचेतना, उपचार सुविधा र आवश्यक सेवा प्रवाहमा स्थानीय तहको सक्रियता देखिनु सकारात्मक संकेतका रूपमा लिइएको छ। कार्यक्रम कालिका स्वावलम्बन सामाजिक केन्द्रको सहकार्यमा आयोजना गरिएको नगरपालिकाकाले जनाएको छ ।
कार्यक्रमले कुपोषित बालबालिकाको पहिचान, उपचार र पुनःस्थापना, समुदायस्तरमा पोषण सचेतना विस्तार, स्थानीय स्रोत र सहकार्य संस्थाको प्रभावकारी उपयोगलाई जोड दिएको छ । यस प्रयासहरूले महाराजगञ्जलाई स्वस्थ, सशक्त र पोषणमैत्री नगरपालिका बनाउने आधार तयार पार्ने अपेक्षा लिइएको छ।