इन्द्रेणी सामुदायिक बन उपभोक्ता समूहको १५औँ साधारण सभा सम्पन्नवन हाम्रो साझा सम्पत्ति हो उपाध्यक्ष चौधरी

विजयनगर, कात्तिक २६

कपिलवस्तुको विजयनगर गाउँपालिका–२ स्थित इन्द्रेणी सामुदायिक बन उपभोक्ता समूहको १५औँ साधारणसभा बुधबार लोहरौलामा सम्पन्न भएको छ । आर्थिक वर्ष २०८१÷०८२ को वार्षिक प्रतिवेदन प्रस्तुत गर्दै समूहले वन संरक्षण, पुनरुत्पादन तथा सामुदायिक सहभागितामार्फत वनको दिगो उपयोगमा जोड दिएको छ ।
कार्यक्रमकी प्रमुख अतिथि तथा गाउँपालिका उपाध्यक्ष लक्ष्मी कुमारी चौधरीले सामुदायिक बनहरू वन संरक्षण र अतिक्रमण नियन्त्रणमा अग्रणी भूमिका खेल्दै आएको बताउनु भयो । उपाध्यक्ष चौधरीले “वन हाम्रो साझा सम्पत्ति हो, यसको सुरक्षा र वृक्षारोपणमा सबैको समान दायित्व रहन्छ ।” बताउनु भयो ।
डिभिजन बन कार्यालय गौतमबुद्ध चन्द्रौटाका वरिष्ठ बन अधिकृत महेन्द्रराज वाग्लेले समुदायको सहकार्य बिना वन अतिक्रमण रोकथाम सम्भव नहुने उल्लेख गर्दै स्थानीय तहबाट सचेतना र निगरानी सुदृढ गर्नुपर्नेमा जोड दिनु भयो ।
सामुदायिक बन उपभोक्ता समूहका अध्यक्ष बनवारीलाल चौधरीले वन संरक्षण र समुदायको समृद्धि एकअर्कासँग जोडिएको विषय भएको बताउँदै सबैको साझा प्रयासले मात्र दीर्घकालीन वन संरक्षण सम्भव हुने धारणा राख्नु भयो ।
अध्यक्ष चौधरीका अनुसार समूहले चालु वर्षमा ५.५ किलोमिटर वनमार्ग मर्मत, ४ किलोमिटरमा अग्नि रेखा निर्माण र स्तरोन्नती, ३० हेक्टर क्षेत्रमा पुनरुत्पादन, ६० हेक्टरमा झाडी सरसफाई तथा गोडमेल, साथै डोली डाँडामा पोखरी निर्माणजस्ता कार्य सम्पन्न गरेको छ ।
कार्यक्रममा सहभागी वक्ताहरूले वन संरक्षणलाई जीवनशैलीसँग जोड्दै आगामी पुस्ताका लागि सुरक्षित र हरियो वनको सुनिश्चिततामा सामूहिक प्रतिबद्धता जनाएका थिए । सभामा आगामी योजनासहितका कार्यक्रमहरू पनि प्रस्तुत गरिएको थियो ।