विजयनगरमा दुई दिने निःशुल्क आँखा जाँच शिविर

विजयनगर, ३ मंसिर

कपिलवस्तुको विजयनगर गाउँपालिकामा सञ्चालन गरिएको दुई दिने निःशुल्क आँखा जाँच शिविर सोमबार सफलतापूर्वक सम्पन्न भएको छ। विजयनगर आधारभूत अस्पताल बध्दौरमा आयोजित उक्त शिविरबाट ४०४ जनाले आँखा जाँच सेवा प्राप्त गरेका छन्।
जाँच गरिएका मध्ये १२९ जनामा मोतिबिन्दुको समस्या पुष्टि भएको अस्पतालले जनाएको छ। मोतिबिन्दु पुष्टि भएका सबै बिरामीको अस्पतालमै निःशुल्क शल्यक्रिया गरिएको विजयनगर गाउँपालिकाले जनाएको छ ।
उक्त शिविर विजयनगर गाउँपालिकाको आयोजना तथा छन्द (कालेबाबु) नारायणी आँखा अस्पताल, बहादुरगञ्जको प्राविधिक सहयोगमा सम्पन्न गरिएको विजयनगर गाउँपालिकाकी उपाध्यक्ष लक्ष्मी कुमारी चौधरीले बताउनु भयो ।