कपिलवस्तु, मंसिर ३
बाणगंगा नगरपालिका–२ स्थित पिपरा अस्पतालमा १६ महिनादेखि मेडिकल सुपरिटेन्डेन्टका रूपमा सेवा दिँदै आएकी एमडीजीपी डा. सरस्वती भट्टराई सरुवा भई काठमाडौंस्थित टेकु अस्पतालमा जाने भएकी छन् । उनको कार्यकाल अस्पतालको सेवा विस्तार, संरचनागत सुधार र विशेषज्ञ उपचारस्थलको रूपमा पिपराको उचाइ स्थापित गर्ने महत्वपूर्ण चरणका रूपमा सम्झिने गरिएको छ।
सीमित बजेट, अपुग पूर्वाधार र न्यून जनशक्ति जस्ता चुनौतीपूर्ण परिस्थितिमा पनि उनले नेतृत्व गरेको अस्पतालले प्रदेशमै ‘नमूना स्थानीय अस्पताल’ उपाधि पाउन सफल भएको हो। अस्पतालको गुणस्तर वृद्धि, सीप अभिवृद्धि, द्रुत निर्णय क्षमता र समन्वय प्रक्रियामा उनले अपनाएको कार्यशैलीले संस्था छोटो अवधिमा नै उल्लेखनीय परिवर्तनका चरण पार गरेको अस्पतालका कर्मचारीहरू बताउँछन्।
डा. भट्टराईको नेतृत्वमा अस्पतालले सुरक्षित मातृत्व कार्यक्रम, पोषण सेवा, सुरक्षित गर्भपतन सेवा, नियमित ओपीडी, इमर्जेन्सी, २४ घण्टा प्रयोगशाला तथा फार्मेसी सेवा, थाइराइड परीक्षणलगायतका सेवा व्यवस्थित रूपमा सञ्चालनमा ल्याएको छ। यी सेवाले स्थानीय नागरिकलाई नजिकमै गुणस्तरीय स्वास्थ्य सेवा प्राप्त गर्न सहज बनाएको छ र अनावश्यक रेफर दरमा उल्लेखनीय कमी आएको अस्पताल प्रशासनको भनाइ छ।
उनको पहलमा पिपरा अस्पतालले अन्य स्थानीय तहका स्वास्थ्य संस्थामा प्रायः नपाइने सेवा सुरु गर्न सक्षम भएको छ। अहिले अस्पतालमा जनरल फिजिसियन सेवा, स्त्रीरोग–प्रसूति सेवा, शल्यक्रिया, भिडियो एक्स–रे, पोस्टमार्टम, उन्नत प्रयोगशाला परीक्षणलगायत सेवा नियमित रूपमा उपलब्ध छन्। यी सेवाले पिपरा अस्पताललाई प्रदेशका स्थानीय अस्पतालहरूमध्ये विशिष्ट स्तरमा परिचित गराएको छ। स्रोत अभावमा पनि प्रभावकारी नेतृत्व अपुग पूर्वाधार र सीमित जनशक्तिको बीचमा पनि उपलब्ध स्रोतको अधिकतम उपयोग, सेवा प्रदायकहरूको क्षमता विकास, बिरामी–केन्द्रित प्रक्रिया र व्यवस्थापनमा नवप्रयोगले अस्पताललाई प्रतिस्पर्धी स्वास्थ्य संस्था बनाएको छ। “स्रोत अभावले प्रगतिमा रोक्दैन, नेतृत्व र दृष्टिकोणले बाटो खोल्छ” भन्ने उदाहरण उनले प्रस्तुत गरेको भन्दै स्थानीयहरूले प्रशंसा गरेका छन्।
डा. भट्टराईले तयार पारेको भावी योजनाअनुसार अस्पतालमा निकट भविष्यमा अर्थोपेडिक (हड्डी), बालरोग र मानसिक स्वास्थ्य सेवा सुरु गर्ने तयारी अन्तिम चरणमा पुगेको छ। यी सेवा सञ्चालन भएपछि पिपरा अस्पतालले अझ ठूलो क्षेत्रका बिरामीलाई आकर्षित गर्ने र रेफर दर अझ न्यून हुने अपेक्षा गरिएको छ।
डा. भट्टराईले आफ्नो कार्यकालभर सहयोग गर्ने बाणगंगा नगरपालिका, अस्पताल परिवार, स्थानीय समुदाय तथा विभिन्न साझेदार संस्थाप्रति कृतज्ञता व्यक्त गरेकी छिन्। नगर विकासका लागि दीर्घकालीन योजनासहित अघि बढिरहेको भन्दै उन्होंने मेयर चक्रपाणी अर्यालको भूमिकालाई पनि सराहेकी छिन्।
१६ महिनाको अवधिमा सेवा विस्तारदेखि विशेषज्ञ उपचारसम्मका धेरै महत्वपूर्ण सुधार आरम्भ गर्ने डा. भट्टराईको नेतृत्वले पिपरा अस्पताललाई आधुनिक, विश्वासिलो र सुविधा सम्पन्न स्थानीय अस्पतालको मार्गमा दृढ रूपमा अघि बढाएको सबैको विश्वास छ। उनका पहल, सुधार र दीर्घकालीन योजनाले अस्पतालको भविष्यलाई अझ सक्षम र समृद्ध बनाउने अपेक्षा गरिएको छ।
प्रतिक्रिया