हिजो र आजको नेपालः सूचकमा प्रदेश सभा सदस्य पंथी

कपिलवस्तु, १५ माघ

नेपालले पछिल्ला दशकहरूमा आर्थिक, सामाजिक तथा मानव विकासका सूचकहरूमा उल्लेखनीय प्रगति गरेको लुम्बिनी प्रदेश सभा सदस्य विष्णु प्रसाद पंथीले सामाजिक संजाल मार्फत तथ्य सहित विचार सार्वजनिक गर्नु भएको छ । प्रदेश सभा सदस्य पंथीले विगत र वर्तमानको तथ्याङ्कलाई तुलनात्मक रूपमा हेर्दा मुलुक सही दिशामा अघि बढिरहेको स्पष्ट देखिन्छ । लुम्बिनी प्रदेश सभा सदस्य विष्णु प्रसाद पंथीका अनुसार यी उपलब्धिहरू नीति, राजनीतिक चेतना, सामाजिक जागरण र जनताको सामूहिक प्रयासको परिणाम हुन् ।
२०४७ सालमा प्रतिव्यक्ति आय केवल ४ हजार १८५ रुपैयाँ रहेको अवस्थामा आज यो बढेर २०८२ सालमा करिब ४१ हजार ५०० रुपैयाँ पुगेको छ । यसले नेपाली नागरिकको क्रयशक्ति र जीवनस्तरमा सुधार आएको संकेत गर्दछ ।
त्यसैगरी, २०४७ सालमा ४१.७६ प्रतिशत जनसंख्या गरिबीको रेखामुनि रहेको नेपालमा हाल यो अनुपात घटेर करिब २०.२७ प्रतिशत मा झरेको छ । गरिबी न्यूनीकरणमा यो एक महत्वपूर्ण उपलब्धि मानिन्छ ।
शिक्षाको क्षेत्रमा पनि उल्लेखनीय परिवर्तन देखिएको छ । साक्षरता दर विगतमा ३९.६५ प्रतिशत मात्र रहेकोमा आज बढेर ७६.२५ प्रतिशत पुगेको छ । यसले शिक्षा पहुँच विस्तार र सामाजिक चेतनाको स्तर बढेको स्पष्ट पार्छ ।
स्वास्थ्य सूचकहरू झनै उत्साहजनक छन् । २०४७ मा औसत आयु पहिले ५४.८३ वर्ष रहेकोमा अहिले ७२.१९ वर्ष पुगेको छ । बाल मृत्यु दर पनि ठूलो रूपमा घटेको छ—पहिले प्रति हजार ९७ जना बालबालिकाको मृत्यु हुने अवस्थामा अहिले यो घटेर करिब १६ जनामा सीमित भएको छ ।
अर्थतन्त्रको सुदृढताको अर्को महत्वपूर्ण सूचक वैदेशिक मुद्रा सञ्चिति हो । कुनै समय ४०.२९ अर्ब रुपैयाँ रहेको वैदेशिक मुद्रा सञ्चिति हाल ४२१ अर्ब रुपैयाँभन्दा बढी पुगेको छ, जसले देशको आर्थिक स्थायित्व र आत्मनिर्भरतातर्फको यात्रालाई बलियो बनाएको छ ।
प्रदेश सभा सदस्य पंथीले यी उपलब्धिहरूलाई “नकारात्मक सोचलाई चिर्दै आशा र सम्भावनाको नेपाल निर्माणतर्फको बलियो संकेत” का रूपमा व्याख्या गर्नु भएको छ । उहाँका अनुसार अझै धेरै गर्न बाँकी भए पनि, तथ्याङ्कले नेपाल निराशाको होइन, सम्भावनाको देश भएको प्रमाणित गरेको छ ।
“हामीले उपलब्धिलाई आत्मसात् गर्दै कमजोरी सुधारमा लाग्यौं भने समृद्ध नेपाल र सुखी नेपालीको सपना अवश्य साकार हुन्छ,” पंथीको भनाइ छ ।
यी सूचकहरूले हिजोको नेपालभन्दा आजको नेपाल बढी सक्षम, सचेत र भविष्यप्रति आशावादी बन्दै गएको सन्देश स्पष्ट रूपमा दिन्छन् ।