‘मोस्टवान्टेड’ सूचीमा रहेका यादव पक्राउ

नेपालगञ्ज ९ असार । प्रहरीको ‘मोस्टवान्टेड’ सूचीमा रहेका राजेश यादव उर्फ धर्मा सिंहलाई प्रहरीले पक्राउ गरेको छ । भूमिगत समूह तराई जनतान्त्रिक मुक्ति मोर्चा ज्वालासिंहको कार्यकर्ता समेत हुन् यादव । ज्यान सम्बन्धी कसुर, अपहरण तथा शरीर बन्धक, हात हतियार खरखजाना, विष्फोटकलगायत नौ वटा मुद्दाका अभियुक्त यादवलाई बाँके प्रहरीले मंगलबार बिहान ३ बजे पक्राउ गरेको हो । लामो समयदेखि भारतमा बस्दै आएका यादवलाई वनकट्टीबाटै पक्राउ गरेको बाँकेका एसपी ओम रानाले रातोपाटीलाई बताए । यादवको साथबाट तरबार र चक्कुसमेत बरामद भएको छ । घटनाबारे थप अनुसन्धान भइरहेको प्रहरीले जनाएको छ ।