सलह भगाउने क्रममा गोठ जलेर पूर्णरुपमा नष्ट

प्युठान १८ असार । प्युठानको झिमरुक गाउँपालिका वडा नम्बर ३ आफ्रेखोलामा सलह भगाउनकालागि आगो बाल्ने क्रममा एक गोठ जलेर पूर्णरुपमा नष्ट भएको छ।बुधबार दिउँसो १ बजेतिर बारीमा आएका सलह भगाउनका लागि आगो बाल्दै कल्पना जि सीको गोठमा आगलागी भएको हो। आगलागीबाट गोठमा रहेका घाँस, दाउरा, पराल पूर्ण रुपमा जलेर नष्ट भएको जिसीले बताउनुभयो । आफुले बारीमा सलह लखेट्दै गर्दा १० वर्षीय छोराले बालेको आगोले गोठ जलेको हो ।‘सलहबाट मकै बाली बचाउन लाग्दा लाखौको क्षति भयो। बरु मकै सलहले खाएको भए कम क्षति हुन्थ्यो, गोठ बच्दथ्यो’,उहाँले भन्नुभयो । नजिकैमा रहेको अर्को घरमा आगो सल्किन लाग्दा स्थानीयहरुले नियन्त्रणमा लिएका थिए।