पाल्पामा पहिरोमा परेर बेपत्ता ५ जनामध्ये दुई जनाको शव फेला

पाल्पा ९ असोज । पाल्पाको रम्भा गाउँपालिका २ को फोक्सिङकोटमा पहिरोमा परेर बेपत्ता भएका ५ जनामध्ये शुक्रबार दिउँसो दुई जना महिलाको शव भेटिएको छ । दुई जनाको शव भेटिए पनि परिचय भने खुलेको छैन ।बिहीबार बिहान पहिरोले घर पुरिँदा एकै परिवारका पाँच जना बेपत्ता भएका थिए । पहिरोमा परेर हुमबहादुर गाहा, उहाँका श्रीमती धनी गाहा, छोरी कृष्णामाया गाहा, नातिनी खुमिसरा आले र नातिनि लक्ष्मी गाहा बेपत्ता भएका थिए ।

  बेपत्तामध्ये शुक्रबार दिउँसो सवा १२ बजे दुई महिलाको शव भेटिएको सशस्त्र प्रहरी बल पाल्पाका प्रमुख अरुण सिंहले जानकारी दिनुभयो । बिहीबार निरन्तर झरी र पहिरो जाने क्रम नरोकिएपछि शुक्रबार बिहानदेखि मात्र बेपत्ताहरुको खोजी सुरु भएको हो । बिहीबार नै पहिरोले घर पुरिँदा त्यही वडाकी २७ वर्षीया मोतीसरा गाहाको ज्यान गएको थियो ।