अर्घाखाँचीमा शव गाडेको ५ महिनापछि उत्खनन् गरि परम्परा अनुसार दाहसंस्कार

अर्घाखाँची १८ कार्तिक । अर्घाखाँचीमा कोरोना सङ्क्रमितको शव गाडेको ५ महिनापछि  उत्खनन् गरेर हिन्दु परम्परा अनुसार दाहसंस्कार गरिएको छ । मालारानी गाउँपालिका वडा नं ४ खनका ५७ वर्षीय यमप्रसाद खनालको गएको जेठ २८ गते बुटवलमा उपचार गरेर फर्कने क्रममा बाटो मै ज्यान गएको थियो । स्वाब परीक्षण गर्दा उहाँमा कोरोना पोजेटिभ देखिएको थियो । कोरोना पोजेटिभ देखिएपछि शव कसरी व्यवस्थापन गर्ने विषयमा विवाद हुँदा शवलाई २ दिनसम्म खुल्ला चौरमा राख्न परिवारका सदस्य बाध्य भएका थिए ।परिवारले चाहेको ठाउँमा शव व्यवस्थापन र परम्परा अनुसार काजकिरिया गर्न पाएका थिएनन् । अहिले ५ महिनामा शवलाई उत्खनन् गरेर हिन्दु परम्पराअनुसार शवको अन्त्येष्टि गरिएको आफन्त प्रकाश खनालले बताउनुभयो ।