प्रहरीलाई गोली हान्न खोज्ने खाग तस्कर को हुन?

रुपन्देही २१ मङ्सिर ।रुपन्देहीको बुटवल उपमहानगरपालिका ८ सुख्खा नगरस्थित कलश होटलबाट १ थान गैंडाको खाग सहित पक्राउ परेका ३ जनाको परिचय प्रहरीले सार्वजनिक गरेको छ । पक्राउ पर्नेहरुमा सुर्खेत लेकबेसी गाउँपालिका बस्ने ३१ वर्षीय भक्त बहादुर थापा, जाजरकोट बोरेकोट गाउँपालिका ४ बस्ने २६ वर्षीय कर्ण बहादुर राउत र काठमाडौं महानगरपालिका १ बसन्तपुर बस्ने २६ वर्षीय राकेश न्यौपाने रहेका छन् ।

    उक्त होटलमा गैंडाको खाग तस्करी हुँदैछ भन्ने सूचना प्राप्त हुनासाथ ईलाका प्रहरी कार्यालय बुटवलबाट प्रहरी नायव उपरीक्षकको कमाण्डमा खटिएको प्रहरीले उक्त खाग सहित उनीहरुलाई पक्राउ गरेको हो । साथै उनीहरुलाई नियन्त्रणमा लिने क्रममा उनीहरुले प्रहरीसँग रहेको पेस्तोल खोसी गोली चलाउँदा उनीहरु मध्येकै न्यौपाने घाइते भएका थिए । उनको अहिले मेडिकल कलेज भैरहवामा उपचार भइरहेको प्रहरीले जनाएको छ । साथै उक्त कार्यमा संलग्न १ जनाको खोजी जारी रहेको र पक्राउ परेका माथि थप अनुसन्धान भइरहेको प्रहरीले जनाएको छ ।