पाँचथरमा जीप दुर्घटना हुँदा एक जनाको मृत्यु

पाँचथर, १८ चैत । पाँचथरमा जीप दुर्घटना हुँदा एक जनाको मृत्यु हुनका साथै एक जना घाइते बनेका छन् ।बुधबार बिहान ६ बजे फिदिमबाट च्याङथापुतर्फ जाँदै गरेको मे १ ज ३५६ नम्बरको जीप याङबरक गाउँपालिका–३ ओयाम यलम्बर चोकमा दुर्घटनामा परेको हो । दुर्घटनमा जीप चालक फिदिम नगरपालिका–२ पल्लोटारका ३६ बर्षीय फुलकुमार राईको मृत्यु भएको हो ।दुर्घटनामा गम्भीर घाइते बनेका उनको जिल्ला अस्पताल पाँचथरमा उपचारको क्रममा पौने १० बजे मृत्यु भएको प्रहरीले जनाएको छ । त्यस्तै दुर्घटनामा सोही स्थानका २२ वर्षीय आशिष राई घाइते बनेका छन् । उनको बीएन्डसी अस्पताल बिर्मामोडमा उपचार भइरहेको जिल्ला प्रहरी कार्यालय पाँचथरले जनाएको छ ।