कपिलवस्तु बैशाख १०
विजयनगरको सान पूर्ण खोप गाउँपालिका हाम्रो अभियान, हाम्रो प्रतिवद्धता गुणस्तरिय खोपको सुनिश्चितता भन्ने नारा सहित कपिलवस्तुको विजयनगर गाउँपालिकालाई एक कार्यक्रमका विच पूर्ण खोप घोषणा गरिएको छ । शुक्रबार गाउँपालिकाको सभाहलमा भएको कार्यक्रममा पालिकालाई पूर्ण खोप पालिका घोषणा गरिएको हो ।
गाउँपालिका पूर्ण खोप हुनु राम्रो पक्ष रहेको बताउदै यसको दिगोपनाका लागी चुनौति थपिएको लुम्बिनी प्रदेश सदस्य अर्जुन कुमार के.सी.ले बताउनु भयो । कपिलवस्तु जिल्लालाई नै पूर्ण खोप जिल्ला घोषणाका लागि गाउँपालिकाले देखाएको तत्परता र सफलता सराहनिय भएको बताउनु भयो । पूर्ण खोपका लागी गाउँपालिका स्वास्थ्य शाखा अन्तर्गतका महिला स्वयसेविकाहरुको भूमिका प्रशसनिय रहेको समेत प्रदेश सभा सदस्य के.सी.ले बताउनु भयो ।पूर्ण खोप निकै जटिल र अप्ठ्यारो अभियान लाई सफल बनाएकोमा गाउँपालिकालाई धन्यवाद समेत दिनु भयो ।
विजयनगर गाउँपालिका सहित जिल्लाका ६ वटा पालिकाहरु पूर्ण खोप घोषणा भइसकेको जिल्ला समन्वय समिति सभापति नारायण ज्ञवालीले बताउनु भयो । पूर्ण खोप घोषणामा मात्रै सिमित नराखेर यसलाई निरन्तता दिदै दिगोपना कायम गर्नु पर्नेमा जोड दिनु भयो । जिल्लामा बाँकी रहेका कपिलवस्तु,कृष्णनगर, महाराजगंज र यशोधारा पालिकालाई पनि बैशाख महिना भित्र नै पूर्ण खोप घोषणा गर्ने तयारी रहेको उहाँले बताउनु भयो । कुनै पनि बालबालिका खोपबाट बन्चित हुन नहुने र त्यसको लागी महिला स्वयसेविकाले निभाउने भूमिका सेवा मात्रै नभएर पुण्यको काम भएको शिवराज नगरपालिका प्रमुख नेत्रराज अधिकारीले बताउनु भयो ।
गाउँपालिकालाई पूर्ण खोप घोषणा गरेर मात्रै सफल नहुने भन्दै यसको दिगोपनाका लागी सबैले आ—आफ्नो ठाउँबाट सहयोग गर्नु पर्ने गाउँपालिका अध्यक्ष गोपाल थापाले बताउनु भयो । पूर्ण खोप अभियानलाई सफल पार्न “खोज र खोप”को अभियान सफल पार्न घरदैलो पुग्ने स्वास्थ्य स्वंयसेविकाहरुलाई अध्यक्ष थापाले धन्यवाद दिनु भयो । पूर्ण खोपको दिगोपनाका लागी अझै स्वास्थ्य कर्मि र स्वयसेविकाहरुको अहम भूमिका रहने हुदाँ सरोकारवाला सबैले साथ दिनु पर्ने बताउनु भयो ।
गाउँपालिकामा रहेका १६ महिना देखि २३ महिना सम्मका ६६९ बालबालिकालाई सबै खोप लगाई सकेपछि पूर्ण खोप गाउँपालिका घोषणा गरिएको गाउँपालिका प्रमुख प्रशासकिय अधिकृत गोविन्द भट्टराईले बताउनु भयो । माघ महिना देखि “खोज र खोप” अभियान सुरु गरि बैशाखमा पूर्ण खोप घोषणा गर्न सफल भएको भट्टराईले बताउनु भयो । खोपको दिगो पनाका लागी जिल्ला स्वास्थ्य कार्यालयले समेत ध्यान दिनु पर्ने वडा नं. ७ का अध्यक्ष दिनेश चौधरीले बताउनु भयो । स्वास्थ्य कार्यालयले भ्याक्सीन र सिरिज बराबर मात्रामा नपठाइ दिदा स्वास्थ्य कर्मिलाई गाहे हुने उहाँले बताउनु भयो ।
कार्यक्रममा गाउँपालिका उप प्रमुख लक्ष्मि चौधरी, जिल्ला खोप अधिकृत चिन्तामणी घिमिरे, फेयर मेड स्वास्थ्य अधिकृत तुल्सी खनाल, युनिसेफ नेपालका नविन सुवेदी लगायतले शुभकामना दिनु भएको थियो । घोषणा कार्यक्रममा गाउँपालिकाका ६७ जना स्वास्थ्य स्वयसेविका र पालिकाका स्वास्थ्य कर्मिलाई सम्मान पत्रबाट सम्मान गरिएको छ । गाउँपालिका अध्यक्ष गोपाल थापाको अध्यक्षतामा सम्पन्न कार्यक्रमको संचालन गाउँपालिका स्वास्थ्य शाखा प्रमुख यज्ञ प्रसाद अधिकारीले गर्नु भएको थियो ।
प्रतिक्रिया