वडा अध्यक्षको २५ हजार तलव खान २५ लाख खर्च गर्नेलाई भोट दिन्नौँ

आसन्न वैशाख ३० गते हुने स्थानीय तहको चुनावमा राजनैतिक दलहरुबाट भइरहेको अनावश्यक खर्चको विषयलाई लिएर कपिलवस्तुको बाणगंगाका मतदाताले प्रश्न उठाएका छन् । वडा नम्बर ४ को वडा अध्यक्ष पदमा गठबन्धनबाट चुनावमा होमिएका वडा अध्यक्ष पदका उम्मेदवार चन्द्रकान्त न्यौपाने, वडा सदस्यहरु विमला श्रेष्ठ, नुर बहादुर राना, रामचन्द्र खनाल लगायतको टोलीसंग अनावश्यक चुनावी खर्चबारे मतदाताले प्रश्न उठाएका हुन् ।

शुक्रबार गजेहडा, काला बञ्जारालगायतका स्थानमा भएको घरदैलोको क्रममा सर्वसधारणले भने ‘वडा अध्यक्षको महिनाको तलव २५ हजार हुन्छ भन्ने सुन्छौँ । त्यो त एउटा ठेला चलाए पनि, २ वटा भैँसी पाले पनि कमाउन सकिन्छ । तर यहाँ त २५ । ५० लाख खर्च गर्न उम्मेदवार किन तँछाड मछाड गरिहेका छन् । यो पटक्कै राम्रो होइन । यो भ्रष्टाचार हो । तिनलाई भोट किन दिने ? दिइनँ ।’

चुनाव हत्याउन जति पनि खर्च गर्न तयार रहने उम्मेदवारलाई भ्रष्टचारीको संज्ञा दिँदै गजेहडाका एक जना युवाले भन्नुभयो ‘यिनीहरुलाई अब भोट दिन हुन्न । गत ५ बर्षसम्म जनप्रतिनिधि र दलले गरेको कामको एकएक हिसाब डायरीमा राखेका छौँ । खर्च गरेर अब कसैले चुनाव जित्छु भन्ने लाग्छ भने त्यो भ्रम हो । कुन उम्मेदवार कस्तो भनेर सबैको कुण्डली पढिरहेका छौँ । राम्रो मान्छेलाई मत दिने हो ।’

जनताको मत जितेमा जनताले आफै मत दिने भन्दै अब पनि जनता ग्वाँर छन् भनेर नसोच्न मतदाताले वडा अध्यक्षका उम्मेदवार न्यौपानेसंग सुनाए । जनताको गुनासो र कुरा सुनेपछि न्यौपानेले त्यसैको विरुद्धमा आफूहरुले कम खर्चिलो चुनाव शैली अपनाएको बताउनु भयो । आफूहरुले नेपालमै फरक तरिकाले चुनाव प्रचार गरिरहेकाले एकपटक विश्वास गरी कलममा मत खसाल्न न्यौपानेले सबैमा आग्रह गर्नुभयो । अहिले भइरहेको चुनावी खर्च पनि जनताको कर रहेको भन्दै चुनाव जिते भोलि फेरि पदबाट भ्रष्टाचार गरेर असुल्छन् भन्ने कुरामा सचेत रहन पनि मतदातालाई न्यौपानेले आग्रह गर्नुभयो ।

न्यौपानेले अब कुनै पनि समुदायका मानिस रक्सी, मासु र पैसामा विक्ने अवस्था नभएको कुरा घरदैलोको क्रममा आफूले पाएको मायादेवीसंग सुनाउनु भयो । देशभर निकै भड्किलो र खर्चिलो पाराले चुनाव प्रचार प्रसार भइरहेको सन्दर्भमा वडा नम्बर ४ मा गठबन्धनको टोलीले गरिरहेको सरल घरदैलो कार्यक्रमलाई धेरैले अहिले रुचाएका छन् । सवारी साधनको नाममा उनीहरुसंग एउटा अटो रिक्सा छ भने दिनभर हिँडेर उनीहरु हरेक मतदाताको घरमा पुग्ने गर्दछन् । मतदाताकै घरमा खाजानास्ता खाएर उनीहरुको दिन वित्ने गरेको छ । यस वडामा पनि चुनाव हत्याउन अन्य दलले भने निकै खर्च गरिरहेका छन् ।