कपिलवस्तुका २० मतदानस्थल अतिसंवेदनशील

हरि घिमिरे, २९ वैशाख ।
कपिलवस्तुमा स्थानीय तहको निर्वाचनका लागि छुट्टाइएका मतदानस्थल सुरक्षाको दृष्टिकोणले अतिसंवेदनशील सूचीमा परेका छन् । भारतसँग सीमा जोडिएकोले २० मतदानस्थल अतिसंवेदनशील सूचीमा परेका हुन् । प्रजिअ धमेन्द्रकुमार मिश्राले जिल्लामा रहेका २ सय ३५ मतदान स्थललाई सुरक्षाका दृष्टिकोणले तीन तहमा वर्गीकरण गरिएको बताए । जिल्ला सुरक्षा समितिले मतदानको समय र त्यसअघि हुनसक्ने घटनालाई मध्यनजर गरी २० मतदान स्थललाई अति संवेदनशील सुचीमा राखेको हो । मिश्राले निर्वाचन स्थलको निरीक्षणपछि मतदान स्थलको सुची निर्धारण गरिएको बताए ।

समितिले निर्वाचन स्थलको निरीक्षण अनुगमनपछि स्थलहरूलाई वर्गीकरण गरेको हो । जिल्लामा विगतका निर्वाचनमा भएका गतिविधि, सुरक्षा संवेदनशीलता लगायतका विषयमा छलफल गरी मतदान स्थलको वर्गीकरण गरिएको छ ।
जिल्लाका १० पालिकामा ४ सय ६८ मतदान केन्द्र कायम गरिएका छन् । समितिले ६२ लाई संवेदनशील र १ सय ५३ मतदान स्थललाई सामान्यको सूचीमा राखेको छ ।

मतदान केन्द्रमा निर्वाचनका लागि ३ हजार ७४१ कर्मचारीहरू परिचालन मतदान केन्द्रमा निर्वाचनका लागि ३ हजार ७४१ कर्मचारीहरू परिचालन गरिएको जिल्ला निर्वाचन अधिकारी ज्ञानुराज पन्थीले बताए । प्रत्येक केन्द्रमा तीन जना स्वयंसेवक कर्मचारी स्थानीय रूपमा नै नियुक्त भईसकेका छन् । उनका अनुसार निर्वाचनका लागि कर्मचारीहरु केन्द्रमा पुगिसकेका छन् । उता निर्वाचनमा सुरक्षालाई विशेष ध्यान दिइएको प्रहरी उपरीक्षक दानबहादुर कार्कीले बताए । निर्वाचनलाई स्वच्छ र भयरहित बनाउन आफूहरूले भरपर्दो सुरक्षा व्यवस्था मिलाएको उनले बताए । निर्वाचनमा म्यादी, नेपाल प्रहरी र सशस्त्र प्रहरी गरी ४ हजार बढी सुरक्षाकर्मी परिचालन भएका छन् । कपिलवस्तुमा २१ साना र ६ ठुला दल गरी कुल २७ दल मतदानमा सहभागी हुनेछन् ।