विश्व शान्ति क्षेत्र लुम्विनीमा हतियार सहित ३ भारतीय पक्राउ

बुटवल २१ ऋसार । रुपन्देही प्रहरीले लुम्बिनी क्षेत्रबाट हतियारसहित ३ जना भारतीय नागरिक पक्राउ गरेको छ । इलाका प्रहरी कार्यालय लुम्बिनीले भारतको सिद्दार्थनगर बस्ने ३४ वर्षीय मेदी हुसेन, ५१ वर्षीय अक्बर खान र ५५ वर्षीय आसिक अलिलाई पक्राउ गरेको जनाएको छ । आइतबार राति साढे ८ बजे प्रहरी निरीक्षक युवराज जंग कार्कीको कमाण्डमा गस्तीमा खटिएको प्रहरी टोलीले उनीहरुलाई पक्राउ गरेको हो ।
मोटरसाइकल चालक मेदी हुसेनको दाहिने कम्मरपेटीबाट कालो प्लास्टिकको झोलाभित्र एउटा कटुवा पेस्तोल, केएफ ९ एमएम लेखिएको २ राउन्ड गोली र चक्कु एक थान फेला परेको जिल्ला प्रहरी कार्यालयका प्रहरी निरीक्षक बेद पौडेलले जानकारी दिए । प्रहरीले यूपी ५५ एडी ०६८४ नम्बरको मोटरसाइकल पिछा गर्दै जाने क्रममा मोटसाइकल अनियन्त्रित भइ गोरुलाई ठक्कर दिइ दुर्घटना समेत भएको थियो । मोटरसाइकल दुर्घटनामा परि तीनै जना घाइते भएकोले उनीहरुलाई उपचारका लागि मेडिकल कलेज भैरहवा पठाइएको पौडेलले बताए । मोटरसाइकलले ठक्कर दिएको गोरुको घटनास्थलमै मृत्यु भएको प्रहरीले बताएको छ। पक्राउ परेकाहरुबारे अनुसन्धान भइरहेको प्रहरीको भनाइ छ ।