देशका विभिन्न ठाउँमा वर्षा : पहिरोको जोखिम क्षेत्रमा सावधानी अपनाउन आग्रह

काठमाण्डौ १८ भदौ – देशका विभिन्न ठाउँमा पानी परिरहेको छ । अहिले प्रदेश एक, गण्डकी र लुम्बिनीका केही ठाउँमा हल्कादेखि मध्यम वर्षा भैरहेको जल तथा मौसम पूर्वानुमान महाशाखाले जनाएको छ ।
प्रदेश एक, वाग्मती, गण्डकी, लुम्बिनी र सुदूरपश्चिम प्रदेशमा मौसम आंशिकदेखि सामान्य बदली रहेको छ । मधेस र कर्णाली प्रदेशमा पनि मौसम आंशिक बदली छ । मौसम बदली भएका ठाउँमा आज दिउँसोपख पनि मेघगर्जन र चट्याङ्गसहित हल्कादेखि मध्यम वर्षाको सम्भावना रहेको जल तथा मौसम पूर्वानुमान महाशाखाका मौसमविद् बिनु महर्जनले जानकारी दिनुभयो ।
अहिले मनसुनको न्यून चापीय रेखा सरदर स्थानभन्दा केही उत्तरतर्फ रहेको छ । आज राति लुम्बिनी प्रदेश, कर्णाली प्रदेश र सुदूरपश्चिम प्रदेशमा हल्कादेखि मध्यम वर्षा तथा गण्डकी प्रदेशका एकरदुई ठाउँमा ठूलो पानी पर्ने सम्भावना छ । केहि दिनदेखि लगातार जसो पानी परेकाले पहाडी क्षेत्रमा पहिरोको जोखिम रहेको र सतर्कता अपनाउन पनि मौसमविद्को सुझाव छ ।