कपिलवस्तुका उम्मेद्वार पनि ’लौरो’ चिह्नलाई स्वतन्त्र भन्दै झुठ्ठा प्रचार गर्दै

कपिलवस्तु, ३१ असोज ।कपिलवस्तुमा ’लौरो’ चुनाव चिह्न लिएको राजनीतिक दल ‘हाम्रो नेपाली पार्टी’ का उम्मेदवारले स्वतन्त्र उम्मेदवारको रुपमा खुलेआम प्रचारप्रसार गरिरहेको पाईएको छ । सो दलका उम्मेदवारहरुले कपिलवस्तुको क्षेत्र नम्बर १ सहितका क्षेत्रमा स्वतन्त्र उम्मेदवारको रुपमा प्रचारप्रसार गरेको पाईएको हो ।सडक छेउका पोल, घरका भित्तामा पास्टरहरु टास्ने गरेको देखिएको छ । उनीहरुले आफुहरु स्वतन्त्र उम्मेदवारको भन्दै आम मतदाताहरु सम्म पुगेको बाणगंगा ११ का रामु चौधरीले जानकारी दिए । उनीहरुले गाडीहरुमा नै व्यानर तथा पोस्टरहरु टासेर साउण्ड सिस्टमको प्रयोग गरि प्रचारप्रसार गरेको अर्का एक स्थानीय विश्राम चौधरीले बताए ।

यस सम्बन्धमा जिल्ला निर्वाचन कार्यालय कपिलवस्तु भने बेखबर छ । कपिलवस्तु क्षेत्र नम्बर १ निर्वाचन अधिकृत शिव प्रसाद पराजुलीले यस सम्बन्धमा कुनै जानकारी नरहेको बताए । उनले त्यस्तो भएको पाईए आफुहरुले अनुगमन समितिलाई जानकारी गराउने बताए ।निर्वाचन आयोगले कतिपय जिल्लामा हाम्रो नेपाली पार्टी’ का उम्मेदवारले स्वतन्त्र उम्मेदवारको रुपमा प्रचारप्रसार गरिरहेको थाहा पाएपछि कारबाही प्रक्रिया अघि बढाएको छ ।आयोगले सो दलका उम्मेदवारहरुलाई पत्राचार गर्दै आचारसंहिता उल्लंघनको कसुरमा किन कारबाही नगर्ने रु भन्ने कारणसहित २४ घण्टाभित्र स्पष्टीकरण दिन समेत भनेको छ । यद्यपी कपिलवस्तु भने ती जिल्लामा परेको छैन ।