कास्की, १६ असार । अर्थमन्त्री एवं नेपाली कांग्रेसका प्रवक्ता डा. प्रकाशशरण महतले सत्ता गठबन्धन फेर्ने कुरा हल्ला मात्रै भएको बताउनुभएको छ । प्रेस युनियन कास्कीले शनिबार पोखरामा आयोजना गरेको पत्रकार सम्मेलनमा महतले गठबन्धन फेर्ने कुरा अफवाह मात्र भएको बताउनुभएको हो ।
उहाँले संसदमा सबै दलका नेताहरु भेट हुने र छलफल गर्नु सामान्य भएको बताउनुभयो । गठबन्धन फेर्ने भन्ने कुरा सबै अफवाह र भ्रम भएको भन्दै सत्ता गठबन्धन निश्चित लक्ष लिएर अगाडि बढेको उहाँको भनाइ छ।
मन्त्री महतले नयाँ बजेटले देशको अर्थतन्त्र फरक उचाइमा पुग्ने बताउनुभयो । अहिले वैदेशिक मुद्राको सञ्चिति धेरै भएको, पर्यटन फस्टाउन थालेको भन्दै नयाँ बजेटले अर्थतन्त्र चलायमान बनाउन सहयोग पुग्ने उहाँले बताउनुभयो । तर पुँजीगत बजेट साँघुरिँदै गएकोमा उहाँले चिन्ता व्यक्त गर्नुभयो । यस्तै आगामी वर्ष आन्तरिक आम्दानी बढाउने र वैदेशिक लगानी परिचालनमा जोड दिने उहाँको भनाइ छ ।
प्रतिक्रिया