गुडिरहेको बसमा करेन्ट लाग्दा बाबु–छोराको मृत्यु

दाङ, २१ असार ।
दाङको तुलसीपुरबाट रोल्पाका लागि छुटेको यात्रुवाहक बसमा विद्युतीय तारले करेन्ट लागेर बाबु–छोराको मृत्यु भएको छ।
उक्त घटनामा एकजना गम्भीर घाइते भएको प्रहरीले जनाएको छ। तुलसीपुर–सल्यान सडक खण्डअन्तर्गत कपुरकोट गाउँपालिका– ३ चोरखोलानजिकै लत्रिएको ११ हजार भोल्टेजको विद्युतीय तारमा रा.१ ख ८३४ नम्बरको बसले छुँदा दुईजनाको मृत्यु भएको हो।

मृत्यु हुनेमा रोल्पाको गंगादेव गाउँपालिका– ४ निवासी ७० वर्षका बालाराम डाँगी र उनका छोरा ४५ वर्षका टोपलाल डाँगी रहेको जिल्ला प्रहरी कार्यालय सल्यानका प्रहरी निरीक्षक गोपाल श्रेष्ठले जानकारी दिए।

प्रहरीका अनुसार गाडीधनी सल्यानको छत्रेश्वरी गाउँपालिका– ६ निवासी ३३ वर्षका महेन्द्र वली गम्भीर घाइते भएको छन्। बसमा २७ जना यात्रु सवार थिए।