रुकुमको मुसीकोटमा ओडारबाट सात थान भरुवा बन्दुक बरामद

रुकुम पश्चिम, १६ साउन । रुकुम पश्चिमको मुसीकोट नगरपालिका ७ ग्यामखोलाको जङ्गलमा सात वटा भरुवा बन्दुक फेला परेको छ । सोमवार हिजो बेलुका प्रहरीले जङ्गलको बीचमा रहेको ओडारबाट सात थान भरुवा बन्दुक फेला पारेको हो ।

जिल्ला प्रहरी कार्यालय रुकुम पश्चिमका प्रहरी निरीक्षक विष्णुप्रसाद श्रेष्ठका अनुसार गोप्य सूचनाका आधारमा बेवारिसे अवस्थामा रहेको बन्दुक फेला पारिएको हो ।

फेला पारिएका बन्दुकहरु बरामद गरेर जिल्ला प्रहरी कार्यालयमा ल्याइएको प्रहरी निरीक्षक श्रेष्ठले बताउनुभयो । बन्दुकहरु कसले र किन राखेको हो भन्ने विषयमा अनुसन्धान भइरहेको प्रहरीको भनाइ छ । स्थानीयले सिकार खेल्नका लागि भरुवा बन्दुक प्रयोग गर्ने र ओडारमै लुकाउने गरेको हुनसक्ने आशङ्का गरिएको छ ।