बाणगंगाका ३ विद्यालयमा नेपाली सेनाको परेड

कपिलवस्तु १७ साउन । बाणगंगाका ३ विद्यालयमा सेनाको परेड भन्दा अनौठो लाग्न सक्छ तर विद्यार्थीलाई सेनाले यस्तै परेड खेल्ने कृयाकलापमा सरिक गराएको छ ।कपिलवस्तुको बाणगंगा नगरपालिका स्थित विभिन्न तीन वटा विद्यालयमा नेपाली सेनाको जुनियर एनसीसी तालिम विद्यार्थीका लागि संचालन गरिएको छ । साउन १ गते देखि सुरु भएको यो तालिममा विद्यालयमा अध्ययनरत विभिन्न कक्षा र तहका विद्यार्थीहरु सहभागि भएका छन् ।कपिलवस्तुमा यस पटक बाणगंगा नगरपालिका अन्र्तगतका विभिन्न तीन वटा विद्यालय यो तालिमका लागि छनोट भइ तालिम संचालन भएका हुन ।

जनज्योति मावि मोतिपुर, सूर्याेदय मावि बरवा र होराइजन मावि सिद्धीपुरमा नेपाली सेनाको जुनियर एनसीसी तालिम संचालन भइरहेको छ । जनज्योति मावि मोतिपुरमा कक्षा ८, ९ र १० मा अध्ययन गर्ने विद्यार्थीहरु ३६ जना सहभागि रहेको विद्यालयका सहायक प्रधानाध्यापक नारायण प्रसाद घिमिरेले जानकारी दिनुभयो । जनज्योतिमा १८ जना छात्र र १८ जना छात्रा गरी ३६ जनाले जुनियर एनसीसी तालिम लिइरहेका छन् । उनीहरुलाई शमसेर दल गण गोरुसिँगेले दैनिक तामिल संचालन गरिरहेको छ ।विद्यालयमा ७९ उनासी दिन र बाँकी नेपाली सेनाको व्यारेकमै संचालन हुने गरी सहभागि विद्यार्थीहरुलाई जम्मा १०० दिनको तालिम संचालन हुने बताइएको छ ।
तालिममा शारिरिक अभ्यासको अलावा विद्यार्थीहरुको नेतृत्व क्षमतामा विकास, विद्यार्थीहरुमा हुनुपर्ने अनुशासन र बफादारिता, राष्ट्रिय एकताको भावना, व्यक्तिगत विकास तथा क्षमता अभिवृद्धि, सामुहिक आदानप्रदान , समाजमा फैलिने गलत प्रवृत्ति विरुद्ध जनचेतना, दैबिप्रकोप तथा बिपद व्यवस्थापन जस्ता घटनामा सहभागिता लगायत महत्वपूर्ण बिषयमा सिकाइ हुने छ ।