एसईईमा १.६ जीपीए ल्याउने विद्यार्थी निजामती सेवामा प्रवेश गर्न नपाउने

काठमाडौँ, २० साउन । लोकसेवा आयोगले माध्यमिक शिक्षा परीक्षा (एसईई)मा १.६ जीपीए ल्याउने विद्यार्थीलाई निजामती सेवाको प्रतिस्पर्धामा रोक लगाएको छ।

एसईईमा १.६ जीपीए ल्याएका विद्यार्थी माथिल्लो कक्षामा भर्ना हुन पाएपनि सरकारी सेवाका लागि अयोग्य भएका हुन्।
लोकसेवा योगका प्रवक्ता तोयनारायण सुवेदीले राजपत्र अनंकित दोस्रो श्रेणी खरिदार पदकालागि एसईईमा न्यूनतम् २ जीपीए ग्रेड प्वाइन्ट प्राप्त गरेकाले मात्र प्रतिस्पर्धामा सहभागी हुन पाउने कानुनी व्यवस्था भएको बताए।

‘पहिला एसएलसीमा जुनसुकै श्रेणीमा पास भएकाले पनि खरिदारमा प्रतिस्पर्धा गर्न पाउने व्यवस्था थियो। अहिले जीपीए २ भन्दा कम ल्याउने धेरै विद्यार्थी सरकारी जागिरका लागि अयोग्य हुने कानुनी व्यवस्था छ’, उनले भने।

राष्ट्रिय परीक्षा बोर्डका अनुसार हरेक वर्ष करिव ५ लाख विद्यार्थी एसईईमा सहभागी हुन्छन्। परीक्षामा १.६ जीपीए ल्याउने विद्यार्थी माथिल्लो कक्षा ११ मा भर्ना हुन पाउँछन्।

पाठ्यक्रम विकास केन्द्रले एसईईमा १.६ जीपीए ल्याउने विद्यार्थीले आफूले रोजेको जुनसुकै विषय अध्ययन गर्न पाउने निर्णय गरेपनि लोकसेवामा प्रतिस्पर्धा गर्न नपाउने भएपछि समस्यामा पर्ने गरेका छन्।