नेपालगञ्ज, ३० साउन ।
लुम्विनी प्रदेशका मुख्यमन्त्री डिल्लीबहादुर चौधरीले बाँकेमा राप्ती नदीबाट वर्सेनि हुने डुवान र कटानको विषयमा प्रदेश सरकार गम्भीर रहेको बताएका छन् । नदी कटान रोक्न तटबन्ध गर्ने विषयलाई आफूले प्राथमिकतामा राखेको मुख्य मन्त्री चौधरीले बताए ।
नेपाली कांग्रेस बाँकेले मंगलवार नेपालगन्जमा आयोजना गरेको कार्यक्रममा मुख्यमन्त्री चौधरीले राप्ती नदी कटानको समस्यालाई स्थायी रुपमा समाधानको लागि केन्द्र सरकारसँग पहल भइरहेको जानकारी दिए । मुख्यमन्त्री चोधरीले भने –‘नदी कटान भईरहेका सबै स्थानमा म आफैले स्थलगत अनुगमन गर्ने तयारीमा छु, यसको समाधानका लागि गुरुयोजना तयार पारेर अगाडि बढ्नुस् प्रदेशबाट म बजेटको ब्वस्था गर्छु ।’
सोमबार बेलुका मात्र बागेश्वरी मन्दिरको महा आरतीमा सहभागिता जनाएका मुख्यमन्त्री चौधरीले बागेश्वरी मन्दिरको विकासका लागि पनि आफूले कुनै कसर बाँकी नराख्ने बताए् । नेपालगन्ज ऐतिहासिक शहर भएकोले यसको विकासका लागि प्रदेश सरकारले विशेष ध्यान दिएको उनले बताए । कार्यक्रममा उनले गुट, उपगुटमा नलाग्न नेता, कार्यकर्तालाई निर्देशन दिए । ‘बाँकेको विकासका लागि म तयार छु, तपाईहरु तयार भएर आउनुस् । गुट, उपगुटमा लाग्नु भयो भने विकास, निर्माणमा असर पर्छ । त्यसले कसैलाई पनि फाइदा पुग्दैन,’ मुख्यमन्त्री चौधरीले भने ।
सोही अवसरमा कांग्रेस बाँकेका सभापति नारायणप्रसाद गौडेलले बाँके जिल्लाका बासिन्दा डुवान र कटानको समस्यासँग जुधिरहेको बताउँदै डुवान र कटान समस्या समाधानका लागि पहल गरिदिन माग गरे । उनले यातायात व्यवस्था कार्यालयको शाखा कोहलपुरमा स्थापना, पार्टीको निर्माणाधीन सुशिल कोइराला स्मृति भवनका लागि सहयोग लगायतका विषयमा मुख्यमन्त्री चौधरीको ध्यानाकर्षण गराएका थिए । राप्ती नदीबाट कटान हुने सबै क्षेत्रमा साउनको दोस्रो सातामा लुम्विनी प्रदेशका भौतिक पूर्वाधार विकास मन्त्री धर्म चौधरीले पनि स्थलगत अनुगमन गरिसकेका छन् ।
प्रतिक्रिया