माधव नेपालको प्रचण्डलाई ज्ञापन पत्र: गठबन्धन छाड्ने पूर्व तयारी ?

काठमाडौ १३ असोज । सत्तारुढ नेकपा (एकीकृत समाजवादी)ले वर्तमान चौतर्फी संकटप्रति सचेत रहन ध्यानाकर्षण गर्दै प्रधानमन्त्री पुष्पकमल दाहाल प्रचण्डलाई ज्ञापनपत्र बुझाएको छ। शनिबार साँझ प्रधानमन्त्रीको सरकारी निवास बालुवाटारमा एकीकृत समाजवादीका अध्यक्ष माधव कुमार नेपालस हितको टोलीले ज्ञापन पत्र बुझाउँदै सो ध्यानाकर्षण गराएको हो।अहिलेको संकटको गम्भीरताप्रति ध्यान दिँदै आवश्यक आर्थिक वित्तिय तथा मौद्रिक कदम चाल्न सो पार्टीले प्रधानमन्त्रीको ध्यानाकर्षण गराएको हो।

यसलाई माधव नेपालले सरकार छाड्ने र एमालेसंग नजिकिएर जाने संकेतका रुपमा समेत विष्लेषण गर्न थालिएको छ। झलनाथ खानालकाृ नेतृत्वमा ठूलै पंक्ति एमालेमा समाहित हुने संकेत पाएका नेपालले यसलाई एक वहाना वनाएको विष्लेषण हुन थालेको छ ।‘देशमा देखिएको चौतर्फी संकट समाधान गर्न सरकारले आवश्यक गम्भीर कदम नचाल्ने हो भने परिस्थिति झन् खराब हुन सक्छ। त्यसैले अहिलेको सङ्कटको गम्भीरताप्रति सरकारको ध्यान जाओस् र आवश्यक आर्थिक, वित्तीय तथा मौद्रिक कदम चालियोस् भन्ने ध्यानाकर्षण गर्न चाहन्छौं,’ प्रधानमन्त्रीलाई बुझाइएको ज्ञापनपत्रमा भनिएको छ।

मुलुक आर्थिक मन्दीबाट आक्रान्त भएको हुँदा समाजमा निराशा, कुण्ठा अराजकता विस्तारित भएको विज्ञप्तिमा उल्लेख छ। त्यस्तै, चाडपर्वको मौका पारेर कालाबजारीहरूले मनपरी गर्न थालेको उल्लेख गर्दै यी समस्याको समाधान गर्न सरकारको ध्यानाकर्षण गराइएको छ।‘यसरी मुलुकले दशकौंदेखिको दुश्चक्रलाई तोड्न सकेन। आज हाम्रो बिग्रदो अर्थतन्त्र, राजनीतिक अन्योल र सामाजिक अन्तर विरोधलाई त्यसै दुश्चक्रको परिणामका रुपमा बुझ्नु पर्छ,’ ज्ञापनपत्रमा भनिएको छ।