४ महिनामा ३ दुर्लभ पाटेबाघको मृत्यु : सहबासमा जान्छ ज्यान

कावासोती ११ जेठ । नवलपुरमा गत चार महिनाको अवधिमा तीनवटा दुर्लभ पाटेबाघ मरेका छन् । बुधबार जिल्लाको विनयीत्रिवेणी गाउँपालिका– २ विनयी खोलाको बगरमा एउटा पाटेबाघ मरेसँगै मृतक बाघको संख्या तीन पुगेको हो ।

विनयी खोलामा पानी पिउँदै गरेको अवस्थामा बाघ देखिएको र पानी पिएको स्थानभन्दा १०–१२ मिटर हिँडेपछि ढलेको स्थानीयले बताएका छन् । स्थानीयले खिचेको उक्त भिडियो अहिले सामाजिक सञ्चालमा भाइरल भएको छ ।स्थानीयले खबर गरेपछि डिभिजन वन र प्रहरीको टोली घटनास्थलमा पुग्दा बाघ मृत फेला परेको डिभिजन वन कार्यालय कावासोतीका प्रमुख वसन्त केशव अधिकारीले जानकारी दिए ।

यो पटक भने बाघसँगै जुधेर घाइते भएको बाघ मरेको हो । बाघको पोष्टमार्टम गर्दा अर्को बाघसँग जुधेर घाइते भएको र घाउ निको नभएका कारण मृत्यु भएको खुलेको हो । चितवन राष्ट्रिय निकुन्जका बरिष्ठ चिकित्सक बिजय कुमार श्रेष्ठको टोलीले बिहीवार पोष्टमार्टम गरेको हो ।
पोष्टमार्टम रिपोर्टमा दुईवटा बाघ लडेको र ढाडमा चोट लागेकोमा सो घाउ निको नभएका कारण उसको मृत्यु भएको चिकित्सकलाई उदृत गर्दै डिभिजन वन अधिकृत लम्सालले बताए । पोथीसँग सहवासको बेला बाघ लड्ने गरेको बताइन्छ ।
‘हरेक बाघको जंगलभित्र एउटा सीमा घेरा हुन्छ । त्यो भित्र अर्को बाघ प्रवेश गरे वा पोथी बाघसँगको सहवासको समयमा बाघहरु जुध्ने गर्छन् । त्यसैबेला घाइते भएको बाघको ढाडमा घाउ देखिएको र निको नभएर मरेको देखिन्छ,’ चिकित्सकलाई उधृत गर्दै वन अधिकृत लम्सालले भने ।

यसअघि फागुन ६ गते मध्यविन्दु नगरपालिका वडा नं। १० अरुणखोलाको जंगलमा र त्यसको १० दिनपछि मध्यविन्दु १५ को नवदुर्गा सामुदायिक वनमा वयस्क पाटेबाघ मारेर गाडेको अवस्थामा फेला परेको थियो । ती दुबै बाघ ढिला गरी गलेको अवस्थामा भेटिएकाले बाघ कसरी मरेका÷मारिएका थिए भन्ने रिपोर्ट भने आएन ।हरेक महिनाजसो एउटा बाघ मर्न थालेपछि लोपुन्मुख पाटेबाघको संरक्षणमा चिन्ता थपिएको छ ।