बुटवल, ०४ साउन । पूर्वपश्चिम राजमार्गसँग जोडिएको बुटवलको नयाँ बसपार्कमा सुविधा सम्पन्न स्नान गृह सञ्चालनमा आएको छ। नयाँ बसपार्कलाई सुविधा सम्पन्न बनाउने बुटवल उपमहानगरपालिकाको योजना अनुसार पहिलो चरणमा सुविधा सम्पन्न बालमैत्री र अपाङ्गमैत्री स्नान गृह सञ्चालनमा आएको हो।
स्नान गृहको आज बुटवल उपमहानगरपालिकाका प्रमुख खेलराज पाण्डेयले उद्घाटन गर्दै बसपार्कलाई व्यवस्थित र सुविधा सम्पन्न बनाउने उद्देश्यका साथ सुविधा सम्पन्न स्नान गृह सञ्चालनमा ल्याएको बताए। उनले बसपार्कमा हाइमास्ट लाइट, क्यान्टिन, चार्जिङ स्टेसन, कोसेली घर र बहुतले पार्किङ भवन निर्माण हुने बताए।
पश्चिम नेपाल बस व्यवसायी प्रालिका प्रबन्ध सञ्चालक रामचन्द्र भुसालले बसपार्क सुधार गर्ने बुटवल उपमहानगरपालिकाको अभियान राम्रो भएको बताए । उनले बसपार्कलाई व्यवस्थित बनाउनका लागि आफूहरूको साथ रहने बताए । बसपार्कमा निर्माण भएको स्नान घरमा ११ वटा शौचालय, १७ वटा युरिनल, ४ वटा बाथरुम तथा २ वटा बालमैत्री, २ वटा अपाङ्गमैत्री शौचालय रहेका छन् ।
स्नान गृहमा मौसमअनुसार चिसो तातोपानीका लागि सोलार प्यानल जडान गरिएको र शौचालयको फोहोरबाट बायो ग्यास उत्पादन गरी स्नान गृहको उपयोगमा ल्याउने गरी व्यवस्था मिलाइएको बुटवल उपमहानगरपालिकाका इन्जिनियर रुक्माङ्गत बस्यालले जानकारी दिएका छन् ।
प्रतिक्रिया