काठमाडौँ १७ पुस
सरकारका प्रवक्ता एवम् सञ्चार तथा सूचना प्रविधिमन्त्री जगदीश खरेलले मुलुक निर्वाचनमय भएको दाबी गर्नु भएको छ। नेपाल उद्योग वाणिज्य महासङ्घले काठमाडौँमा आयोजना गरेको संवाद कार्यक्रमलाई सम्बोधन गर्दै सञ्चारमन्त्री खरेलले यस्तो दाबी गर्नु भएको हो।
उहाँले शीर्ष नेताहरूको कार्यक्रममा चहलपहल र उपस्थिति नै देश निर्वाचनमय भएको उदाहरण भएको जिकिर गर्नुभयो। मन्त्री खरेलले भन्नु भयो, ‘मुलुक निर्वाचनमय भएछ। शीर्ष नेतृत्व खुरुखुरुखुरु हिँड्न थाल्नु भयो भनेपछि अब चुनावको तयारी सुरु भयो। प्रत्यक्षका लागि एक सय ६५ सिट तय गर्नुछ। उहाँहरूलाई छटपटी सुरु भएको, तातिएको अनुभुति गरेको छु। मुलुक निर्वाचनमय भएको छ।’
सञ्चारमन्त्री खरेलले सरकारको म्यान्डेट नै फागुन २१ मा निर्वाचन गराउनु रहेको स्पष्ट पार्नुभयो। उहाँले अब निर्वाचन हुन्छ वा हुँदैन भन्ने अन्यौलता हटेको बताउनु भयो।
उहाँले भन्नुभयो, ‘यो सरकारको म्यान्डेट फागुन २१ गते निर्वाचन गर्नु हो। अब निर्वाचन हुन्छ कि हुँदैन भन्ने अन्योलता सकिएको छ। अब चुनाव सुनिश्चित भएको छ।’
मन्त्री खरेलले पछिल्लो २० वर्षको इतिहासकै सबैभन्दा धेरै भ्रष्टाचारका मुद्दा अदालतमा दर्ता भएको पहिलो पटक भएको दाबी समेत गर्नुभयो।
प्रतिक्रिया