चुरे मधेसको छानाः मुख्यमन्त्री यादव

महोत्तरी, २८ पुस

मधेस प्रदेशका मुख्यमन्त्री कृष्णप्रसाद यादवले चुरे मधेसको छाना भएको बताउनुभएको छ । मधेसको जीवनको आधार हुँदा चुरेको संरक्षण बेगर मधेसको कल्पना गर्न नसकिने उहाँको भनाइ छ । मुख्यमन्त्री यादवले आज महोत्तरीको बर्दिवासमा सम्पन्न ‘चुरे तथा जैविक विविधता संरक्षण एवं उपयोगका लागि नीति निर्माण’ विषयक एक दिने कार्यशालालाई सम्बोधन गर्दै भन्नुभयो, “चुरेबिना मधेसको जीवन रहन्न, तसर्थ यसको संरक्षण र समुचित व्यवस्थापन गरिन पर्छ ।” नेपाल विज्ञान तथा प्रविधि प्रतिष्ठानअन्तर्गतको विशिष्टीकृत अनुसन्धान केन्द्र मधेस प्रदेशले आयोजना गरेको कार्यक्रममा मुख्यमन्त्री यादवले चुरे संरक्षण र व्यवस्थापनमा विज्ञहरुका सुझाव प्रदेश सरकारले कार्यान्वयनमा लाने प्रतिबद्धता जनाउनुभयो । “प्रतिष्ठानका विज्ञहरुले तथ्यपरक ढङ्गले व्यावहारिक सुझाव दिनुहोस्”, यादवले भन्नुभयो, “प्रदेश सरकारले ती सुझाव कार्यान्वयन गर्ने छ ।’’ यस कार्यमा सङ्घीय सरकार, सङ्घीय सरकारका यी क्षेत्र हेर्ने निकाय र सम्बन्धित स्थानीयतह एवं प्रदेश सरकारबीच सहकार्य र समन्वय अपरिहार्य रहेको उहाँको भनाइ छ । यसको मुख्य संयोजनको भूमिका सङ्घीय सरकारले लिनुपर्ने यादवले बताउनुभयो । कार्यक्रममा चुरे र तराई अन्तरसम्बन्धः नीतिगत बहस र छलफल विषयक कार्यपत्र चुरेविज्ञ डा विजयकुमार सिंहले प्रस्तुत गर्नुभयो । कार्यपत्रमा चुरेको सम्वेदनशील खुकुलो प्रकृतिबारे स्पष्ट पार्दै डा सिंहले चुरे संरक्षणमा प्रकृतिजन्य, मानवजन्य र नीतिगत चुनौती रहेका उल्लेख गर्नुभयो । त्यसैगरी डा विनोद भट्टले ‘चुरे संरक्षणः नीति, व्यवहार र कार्यान्वयन’बारे अर्काे कार्यपत्र प्रस्तुत गर्नुभयो । कार्यशालाले चुरे संरक्षण र उपयोग नीतिबारे प्रदेश सरकारलाई सुझाव दिने मधेसको विशिष्टीकृत अनुसन्धान केन्द्रका विज्ञ सदस्य डा विद्यासागर वर्माको भनाइ छ ।