बर्दिया ४ फागुन । वन्यजन्तु संरक्षणकर्मीहरुले बर्दिया राष्ट्रिय निकुञ्जभित्रको राजमार्गमा वन्यजन्तुमैत्री सडक बनाउन माग गरेका छन् ।पाटेबाघ, जंगली हात्ती, गैँडा, चित्तललगायतका वन्यजन्तुहरुको ओहोरदोहोर भइरहने जङ्गलभित्रको सडकमा मानिस र वन्यजन्तु दुवैलाई समस्या भएको भन्दै संरक्षणकर्मीहरुले वन्यजन्तुमैत्री सडक निर्माणको माग गरेका हुन् । कर्णाली चिसापानीदेखि अम्रेनी पोस्ट र रम्मापुरदेखि सैनवार पोष्टसम्मको राजमार्ग क्षेत्रमा तत्काल वन्यजन्तुमैत्री संरचना बनाउनु पर्ने उनीहरुको भनाइ छ ।
संवाद समूहले आयोजना गरेको कार्यक्रममा संरक्षणकर्मीहरुले जंगली हात्ती, पाटेबाघलगायतका वन्यजन्तुको वासस्थानमा बाधा पुगेका कारण पनि उनीहरु आक्रामक बन्न थालेको भन्दै दुवै पक्षका लागि तत्काल संरचना सुधार गर्नुपर्ने बताए ।निकुञ्जको बीचभागमा रहेको सडकमा वन्यजन्तुसँग ठोक्किएर हुने दुर्घटनामा सयौं वन्यजन्तु मर्नुकासाथै मानिसको समेत ज्यान जाने गरेको छ । यस्तै वन्यजन्तुले आक्रमण गरी मानिसको ज्यान पनि लिएका छन्।
प्रतिक्रिया